Normalmente dia de alhad, teniyamos el Diya Internasyonal del Ladino. Ma komo lo deklarimos unos kuantos diyas dospues del rash, lo deshimos a un diya de otonyo: el 5 de Novembre. Vyernes un amigo me embiya un whatsapp demandando komo deve de azer por la reservasion al DIDL. I espero ke solo es el, el ke demando komo devia de irse a este diya. En syertos grupos kreo ke m’olvidi de embiyar estos mesajes de anulasion. Karen informo bastante la djente. Ayer tenia una Reunion i este amigo me demanda si era un yerro lo ke eskrivi? No era djusto. Porke no pudimos organizar el teatro. Kada semana unos/unas kuantos de los ke toman shena tenian otra okupasion i no pudimos realizar. Trokimos la data porke no era posivle de azer provas de teatro i de muzika en estos diyas muy difisil de muestro payis. Es solo muestra amiga Rachel Amado Bortnick ke no troko de program i vino a Estanbol; i dospues se va irse a İzmir. Es noche de Shabat ke vino ande mozotros. Karen i su marido tanbyen estavan envitados. De toda manera era Karen ke la resivio al aeroporto d’Estanbol i vinieron endjuntos. Reelmente fue una noche de shabat bastante enteresante. Tuve la okasion de amostrarle, la koleksion de kartas sovre el Imperio Otomano i la Turkiya: sujeto: Judaika.
Diya de shabat pude verla un tyempo kurto antes ke salga kon una amiga İzmirliya de la eskola, del liseo. Dospues fuimos komo “el sodro i el tiryaki”. Shabat le dishe ke puedemos ir diya de alhad al muzeo. No m’entendio. I la bushki no se kuantas vezes. Komo no se emplea afuera del otel el telefono mobil, no es muy fasil de pueder alkansar. Estava en kudyado i me fui al otel. Siguro ke no estava aya. Keria ir kon eya al Muzeo. I no reushi. Se fue sola diya de lunes. Yo organizi esta vez la vijita por martes.
Martes dospues de midi esta envitada al Şalom. I ay 25-30 personas del Sentro Sefardi ke kijyeron asistir a esta seduta. Todos van a ser muy kontentes de estar endjuntos kon Rachel.
Espero ke la vamos a ver una otra vez el 5 de Novembre para el Diya Internasyonal del Ladino.
Vos kero avlar de la Sinagoga de Antakya dospues del rash. En primero devo de dizir ke kon la muerte de Şaul Cenudi i su mujer Tuna, esto fue la fin de esta chika Komunidad. Kon el ayudo del Ministeryo del Turizmo se organiso una reunion kon las minoridades ke biven en esta sivdad i demandaron ke las Iglesias i la Sinagoga sean restorados en poko tyempo. Malorozamente ay syertas paredes ke fueron derrokadas. Vide un alay de fotografias, ma komo no so arkitekto no entendi lo ke se deve azer. Espero ke van a restorar esta sinagoga ke era bastante frekuentada. Mi dezeo es ke a lo manko una vez al mez dyes famiyas ke se vayan a Antakya kon un hazan para realizar la orasion de Shabat. No se si la Sinagoga tyene un nombre. Ma devemos de dar el nombre de “Beth Shaul” a esta sinagoga.
Tuna Cenudi i Şaul Cenudi, ke vuestras almas repozen en Gan Eden.
