Ke es Purim?
Esta fyesta es konosida popularmente komo
“El Karnaval Djudyo”, i se selebra el 14 Adar ke este anyo es
el 06.-07.03.2023.
Las tradisyones de Purim son: Komer unas dulsuryas triangular ke se yaman “Orejas de Aman” ke mos azen akodrar el personaje el mas malo de esta istorya, se embiya regalos a los serkanos, se da mahpurim a los chikos para ke se gusten, moneda u regalo, i se melda la “Megilat Ester”, la istorya de la reyna Ester ke resivyo las favores del rey i salvo a su puevlo de una muerte a la kual estava kondanada.
“La Megilat Esther” mos ambeza ke las difikultades de la vida ke enkontramos son un egzamen para ayegar, para arivar a lo mas mijor, ke los detenimyentos son okazyones para desveloparmos. I esto todo vyene de la mano del Dyo ke no vemos, i ke mos gia el destino.
Ken fue la reyna Ester?
Ester sinyifika esperansa.
Purim mos aze akodrar los suksesos dramatikos en Persia durante el reynado de Ahasverosh. Los djudyos estuvyeron kastigados por los planes de Aman, ke era el konsejero del rey i ke keriya eksterminar los djudyos.
Purim sinyifika Shans.
El puevlo djudyo se salvo grasyas a los esforsos de Ester i Mordehay.
Ester fue la luz para una mueva jenerasyon de mujeres, ke bushkan a defender los derechos de las minoridades apitadas. Es un egzempyo de koraje i lucha. Reprezenta a todas akeyas mujeres ke persigen ideales nobles i estan dispuestas a sakrifikar sus komodidades, la djustisya, la liberta i la paz. Ester es guerfana de padre i madre, una mujer ermoza. El Rey Ahashverosh se namoro de eya i se kazaron.
Entonses, Mordehay le konta los peligros ke menasan a su puevlo. A este momento Ester desha su karakter de una manseva pasiva i su karakter se developa para tomar grandes desizyones i salvar su puevlo.
Las mitsvas de Purim ampesan kon “Taanit Esther”, ke es el rekuerdo de la data ke Aman aviya desidado de eliminar todos los djudyos.
En Purim, se puede azer komo donasyon “Matanot Laevyonim” ke es embiyar una komida a lo menos a dos personas ke son povres i azerlos gustar en esta fyesta.
Embiyar a un konosido, amigo “Misloah Manot” ke es embiyar dos komidas de todo djusto a una persona, u dar moneda a los menesterozos.
La vida es un miraklo, ma los miraklos son los ke estan guadrados aryento de muestros korasones.
Keridos Lektores, “Hag Purim Sameah”.
Vos esto ogurando un Purim alegre, kon sanedad, kon todas vuestras famiyas, keridos i amigos.
Pujados i non aminguados…
