Moshe Rabenu suvyo a la punta del monte de Sinay. El puevlo lo estavan asperando, la ora ke el va tornar, syendo no les avizo la tornada kuando va ser. Moshe Rabenu estuvo en el monte de Sinay 40 diyas. El kuarenten diya era le 17 del mez de Tamuz. El puevlo se dezespero i les paresyo ke Moshe Rabenu muryo, syendo no tomo kon el ninguna koza de mantenimyento. I viyan ke no abashava la magna kada diya en el monte de Sinay. Sovre esto se rekojeron todos i vinyeron delantre de Aaron Akoen dizyendole ke les aga un dyo, para ke kamine delantre de eyos syendo Moshe Rabenu, el ke los kito de Ejipto, no saven ke es de el, le akonteseriya algun dezastre.
Aaron Akoen, ermano de Moshe Rabenu vyendo el estado de el puevlo, i lo ke demandavan era enposivle de azerlo, kijo ganar tyempo, porke el ya estava siguro ke Moshe Rabenu ya iva tornar, dize ke traygan todos los orejales de oro de sus mujeres i kreaturas. Aaron Akoen penso ke las mujeres i las kreaturas no ivan a dar sus djoyas, ma la djente ajena ke eran auzados a la idolatriya no tadraron de dar sus djoyas.
Aaron Akoen tomo el oro i lo metyo en la lumbre i salyo una forma de un bezero. La djente ke vyeron esta forma de el bezero, se fueron detras de sus vanas kreyansas.
Aaron Akoen vyendo este dezastre, kijo afalagar a el puevlo.
A la demanyana uvo un grande dezorden entre el puevlo. Mosh Rabenu, i el Kriyador se ensanyaron a este estado de el puevlo.
Moshe Rabenu ke amava muncho a el puevlo djudyo, roga a el Dyo santo de repintirse de su ravya kon el puevlo djudyo, por mor de Avraam, Yitshak i Yaakov, i tambyen ke no topen de avlar los puevlos ajenos. El Dyo santo kon su buendad se arepyente de su ravya i perdona a el puevlo djudyo.
