El Diya de la Mujeres es un mesaje al mundo entero. Este diya es un mesaje de progreso, un mesaje de esperansa i de apresiasion. El mas grande progreso de la mujer es la edukasion.
El tema de las Nasiones Unidas para 2023 es "Innovasion i teknolojia para la igualdad de mujeres i ombres". Este tema tiene komo objektivo selebrar la kontribusion ke las mujeres i las ijikas estan aziendo a la teknolojia i la edukasion.
En el mundo, ay munchos paizes ande las mujeres no son tratadas komo iguales kon los ombres. Este diya prokura una platforma para trokar este komporto. Oy, en los paizes developados, las mas grandes korporasiones son dirijadas por mujeres. Las mujeres del oeste son diferentes de las mujeres del este. En el oeste, la majorita de las mujeres arivaron a la parte superior de sus karieras.
En Afganistan, las mujeres estan gerreyando por el derecho a la edukasyon. El anyo pasado, las mujeres en Afganistan i Iran, gerreyaron por sus derechos en medio de la gerra, la violensia i los trokamientos de politika en sus paizes.
En Afganistan, los Talibanes defendieron a las ijikas la edukasyon superior. Las mujeres no pueden lavorar afuera de kaza, no pueden salir a la kaye sin un ombre allado de eyas, i kale ke se serren la kara en publiko.
En Iran, Mahsa Amini, una mujer de 22 anyos, fue arrestada por la polisia en Teheran el 13 de septiembre de 2022 porke violo las estriktas reglas de Iran: las mujeres kale ke se serren la kavesa por modo ke los kaveyos no se veygan. Duspues de la muerte de Mahsa, los protestos kontinuo en el paiz entero por obtener mijor derechos para las mujeres."Mujer, vida, libertad" fue el slogan de los protestos. Las otoridades respondieron kon fuersa. Mas de 500 personas muryeron.
La mitad de la populasion en el mundo son las mujeres, ma dainda no tienen las mezmas oportunidades de los ombres. Las mujeres tienen dainda un largo kamino de kaminar para reushir.
Unos kuantos temas komunes en munchas nasiones sovre los derechos de las mujeres son: estar libre de violensia i diskriminasion, estar libre de violensia seksual, tener el derecho de votar, ganar las mizmas mezadas ke los ombres, tener derechos en kontratos legales, tener los mizmos derechos en la famiya, tener derechos reproduktivos, ser edukada, tener su propriedad i sus bienes...
