En aserkando de Purim meldamos la perasha de Zahor. (Akodrate lo ke te izo Amalek kuando saliendo de Ayifto flako i sufriyendo en el dizyerto, aharvo a los ke estavan kaminando de atras).
Amalek desendiendo de Edom, ke es vinido de Esav, ermano buchuk de Yaakov… Este trivio de Amalek en la perioda Antigua se topava en el Sud-Este de Israel, en los teritoryos ke oy yamamos Yarden, en las tierras konosidas komo Petra. Despues de las konkistas de los Asiryanos i las emigrasyones, Amalek se estuvo yindose verso el Este.
En el siglo 5 lo topamos ke vino en el Imperio Persano, Imperio ke fraguo Sirius despues de su konkista de Babel. Aya lo topamos a Aman desendiendo de Amalek ke se izo konsejero del rey de esta epoka, Xerses. En la megila se nombra Ahashverosh.
Xerses I fue un rey pasivo i flakito sin grande Gloria ke reyno AJ. 465-487 i ke fue matado en una revolusyon. La istorya de Purim se topa en esta epoka i asigun los komentaryos, el Ahashverosh de la Megila es un rey mistiko.
La megila de Ester no mensiyona ni una vez el nombre del Sinyor Del Mundo, ma el Dio esta prezente en este eskrito sovre el nombre del Rey. La megila entera es un sekreto, un mesaje ke mos fue anonsado en la perasha Vayeleh, perasha de la fin de la Tora…. Aya es anonsado estos biervos (Ve-Ayom-Ani-Ester-Astir-Panim) (I yo akel diya me va tapar la kara) Amalek es siempre prezente a atakarmos. Sigun el koryente del hasidik enfluensado por el Zohar, Amalek chafteya a mozotros kuando mos apartamos de la ley, kuando peryemos la fey, la kreensya en la santedad del Sinyor del Mundo, kuando mos deshamos entrenar por kulturas ajenas i perversyon. Alora Amalek reprezentado de la negrigura viene i mos chafteya. Los ke salieron de Ayifto, entre eyos aviya los ke murmureyaron los ke no kreyiyan en el mirakolo, ke teniyan dubyo. En todas las epokas de muestra istorya fuimos chafteyados por Amalek. (dubda = en ivrit = safek) Este biervo tiene la mizma valor numeriko ke Amalek, 240-240. Tanto ke muestra kreensya esta biva i en pies, puedemos luchar kon todos los Amalekes del mundo.
Akodra i no te olvides lo ke te izo Amalek.
