En este periodo de los diyas de rashes, seya en la televisyon, seya en los haberes, enkontrimos a munchos jeologos, ke mos estan eksplikando: “antes de muncho tiempo ya mos avizaron sovre el terremoto”. Malorozamente estavan muy tristes. Achakes ke no dieron importansia a lo ke eksplikaron durante estos anyos. La jeografia del paiz, ya se save ke es enriva de fayes muy aktivos. I ya se savia ke estos diyas ivan a vinir.
Un jeologo, Wilhelm Salomon Calvi, en 1933, kuando las leyes les defendyeron de lavorar a los djudios en las universidades de Alemanya, estava dando lesones en la Universidad de Heildelberg. Kuando peryo su echo, teniya 67 anyos. Era el eksplorador del la agua termal de Heildelberg. Kon la kapachidad del profesor de medisina Philipp Schwartz, partisipo a la asosiyasyon de “Ayuda a los ombres de syensa Alemanes”. Despues munchos de eyos parvinyeron a vinir a Ankara, i en la fakulta de Siensas, konstruyo el enstituto jeolojiko. El primer echo ke izo fue, para konoser el paiz, kamino kilometros del oeste al oriente, tomo notas, suvyo a las montanyas, paso de los rios. En este periodo deskuvrio a los “Peribaca (chimeneyas de andjelos)”, i las aguas subteranyas para Ankara. El profesor Calvi durante estos lavoros, syempre disho: las sivdades de Turkiya estan enriva de los fayes i estos edifisyos en un rash fuerte se pueden derrokkar enteramente.
En 22 enero 1939, prezento un raporto al prezidente İsmet İnönü, al governo, sovre los rashes i kualo kale azer para akavidar de los periglos. El amostro ke, Erzincan era la primer sivdad ke iva tener mas muncho danyo. Ama malorozamente kedo tadre. En 1939, en el rash grande de Erzincan peryimos a 40.000 personas. Oy en diya estos raportos estan en las universidades jeolojikos. I los pofesores jeolojikos de oy estan lavorando enriva de esto, i ya saven los efektos danyozos de los rashes, ya mos estan dizyendo kada diya. Si damos oyido mos vamos a ambezar…
