El rash ke bivimos en muestro payiz; la sekura ke estamos bivyendo en muestro payiz, en la Evropa i en el mundo entero…. Malorozamente no estamos orozos de esta situasion. Vemos en los marketes, mizmo en los pazares ke los presyos de las zarzavates i de las frutas estan pujando kada diya. De ke? Porke kon la sekura tenemos mas mankas zarzavates i frutas. La Turkiya era un paiz bastante emportante en la agrikultura. Ma este anyo el tyempo i las luvyas no mos estan ayudando. Una de las mas emportantes zarzavates es la tomat. I el governo defendyo la eksportasyon por razon del rash ke bivimos. Todos saven ke las personas ke biven en esta rejyon tyenen de menester de todo modo de zarzavates i de frutas. Esta vez los eksportatores estan dizyendo ke en unas kuantas semanas vamos a tener una kuantitad emportante de tomates kon la mueva rekolta i no vamos a pueder konsomar esta kuantitad en muestro payiz. En mi chikes se avlava por la Turkiya ke era un payiz ke abastava de si para si en todo modo de kozas para komer. Ma dospues fraguaron miles i miles de kazas i de fabrikas ande se kultivava todo modo de sereales, de zarzavates i de frutas. En Adapazarı avia miles i miles de hektares ande se kultivava patatas. Dospues vimos ke fraguaron syenes de fabrikas en estas tyerras azlahalias. Syertas lavoran i syertas no lavoran. Ma las patatas no egzisten mas. La ekonomiya turka malorozamente los 15 o 20 anyos dalkavo esta endeksada a los edifisios. Todos estan fraguando. Fraguando mas i mas batimientos non seguros ke se derrokaron en el rash.
Noche de martes fyestimos la fiesta de Purim. Komo kon el rash ke bivio muestro payiz no estamos muy alegres para pueder fyestar muestra fiesta la mas alegre. Unos kuantos anyos antes dospues de Purim en muestro muzeo Djudio organizimos una ekspozision sovre las Megilas de Ester. I reelmente alkansimos a eksposar mas de 50 megilot. Fue una ekspozision muy reushida.
Muestro famozo fotografo, İzzet Keribar travo las fotografias de estas megilas. Ma malorozamente no pudimos azer un livro kon las fotos de estas megilas.
Kreo ke vamos azer un livro kon la ekspozision de las ketubas ke vamos ekspozar.
Hag Purim Sameah.
