Esta mujer, madre de 7 kriyaturas durante los diyas i espiona durante las noches, izo muncho para los judios de Lebanon i de Siriya i otro tanto para el Estado de Israel. Se yama Shula Kohen, adjente de espionaje de Israel en Beyrut.
Shula nasyo en 1917 en Argentina. Unos kuantos anyos despues izieron aliya a Yerushalayim ke estava debasho del mandato de los Inglezes.
A 16 anyos se kazo kon un merkader judio de Lebanon. I se enstalaron en Beyrut. Shula reusho a poko a poko a integrarse en la komunita judiya i ampeso a edukar los mansevos i aparejarlos para ke se vaygan a bivir a Israel. Shula era muy aktiva i tanbien ampeso a azer amigavle kon la “high society” de Lebanon. En el anyo 1947, la vida de Shula ampeso a trokarse. Era djusto el tiempo ke las Nasyones Unidas permetyeron la fondasyon del Estado de Israel. Akeyos tiempos Shula asistyo a una noche de Noel ofisiyala. En una kyoshe del salon oyo Shula ke un ofisiyal Libanez i otro de Siriya estavan avlando, dizyendo ke estos dos payises keren efasar Israel de la karta ma estavan asperando ke los Inglezes se salgan para ampesar a sus planos diabolikos. Shula penso ke kaliya absolutamente ke mandara esta enformasyon a Israel. Kon un kliente de su marido mando una letra kon kod sekreto a Israel. Despues de akel diya Shula, madre de 7 kriyaturas, se aze la espiona del Estado de Israel en Beyrut, kon el kod “La Perla”.
Despues de la deklarasyon de las Nasyones Unidas, los judios del Lebanon ampesaron a tener diyas trajikos. Los estavan matando i estavan derokando sus kazas, magazenes i kales. Alora Shula desido de salvarlos. Profito de sus kontaktos de la armada Libaneza i developo una kadena sekreta para ke pasen por la frontiera libaneza verso Israel. Algunos pasaron por la mar kon barkas de peshkadores.
Una noche de invyerno Shula arekojo munchos mansevos en una sinagoga para mandarlos a la frontiera, los miembros de los servisios sekretos libanezos, enserklaron la sinagoga. Eya pishin les dyo a una kandela a kada uno i izo komo ke estavan fiestando Hanuka. Sovre esto los miembros del servisio sekreto se espartieron de aya i ansina Shula los pudo mandarlos komo previsto.
Shula transfero durante 14 anyos miles de judios de los payises arabos. Beyrut ampeso a supsonar esta mujer i malgrado ke se estava akavidando la denonso uno de sus informantes en 1961 i en 1963 fue kondanada a ser enkolgada ma porke era madre de famiya, su pena fue trokada en 21 anyo de prizyon. Eya fue kestionada muy fuerte ma no les disho dingun sekreto de lo ke saviya.
En 1967 Shula fue liberada despues de la gerra de “6 diyas” en kambyo de los prizoneros. Eya fue enprizonada durante 6 anyos en las prizyones libanezas.
En 2007, kuando tenia Shula 90 anyos, fue eskojida para asender la meshale del diya de la Independensya. En la seremoniya eya disho ke todo lo ke izo fue por el amor a su payiz.
Shula Kohen muryo en 21 Mayo 2017, a 100 anyos en Yerushalayim.
