En el livro Shemot la fragua del Mishkan, el santuvaryo, okupa un lugar muy grande. Kuatro perashiyot son apropyados para esta ovra. En las perashiyot Vayakel i Pekude vemos ke se termino la fragua del santuvaryo, i ya esta pronto para azer el estrenamyento.
La enkomendansa de guadrar el Shabat, en la perasha Ki Tisa vyene despues de la enkomendansa de la fragua de el Mishkan. En la perasha de Vayakel vemos en primero el Shabat i despues la fragua del Mishkan.
En la perasha de Ki Tisa, despues de la nominasyon de Betsalel i Aoliav komo kapos maestros nos enkomenda El Kriyador la grandeza de el diya de Shabat. El sinyor Rashi eksplika dizyendo malgrado ke vash a ser okupados kon vuestras echos, el Shabat no vo lo vash a olvidar. Antes de enkomendar la enkomendansa de la fragua, estamos enkomendados de santifikar el Shabat. Ibn Ezra lo entrepeta este verseto dizyendo: “Malgrado ke somos ovligados de azer el komando de El Todo Poderozo tambien somos ovligados de no ezbivlar el diya Santo de Shabat”. Komo lo developa Rabi Moshe ben Nahman, sesh diyas vash a lavorar en la fragua del Mishkan i no el syeten diya por ke es santo para El Kriyador. Tambien el diya de Shabat va ser santo i para vozotros. En el livro Tora Temima dize “Ayegar sakrefisyos era un dover grande i spiritual en el tyempo de El Bet Amikdash”. I tambien se aziya korbanot en diya de Shabat; por ke razon la fragua del Mishkan no fue permetida en Shabat? La repuesta es ansi: “Los korbanot tyenen un tyempo fikso por ayegarsen, si paso su tyempo lo puede baldar de ayegar este sakrifisyo i se puede pasar una enkomendansa de la Tora pero, por la fragua de el Mishkan no fue taksado un tyempo”.
El Talmud konta la ora ke Moshe Rabenu estava entremetido en el lavoro del Mishkan no se akonsejo kon los dirijentes del puevlo. Les desplazyo muncho a los dirijentes. Los dirijentes de el puevlo enpesaron a traer piedras presyozas ke eran menesterozas para el Mishkan.
En el livro Mishle, Shelomo Ameleh dize: “Pensamyentos kon konsejos se konfirman; tambien en el livro Yehezekel vemos: i bushkaran vizyon de el profeta, i konsejos de los vyejos.” De estos versetos entendemos ke Moshe Rabenu deviya akonsejarse kon los kapos de la nasyon. Moshe Rabenu teniya razon. El plano de el Mishkan El Todo Poderozo se lo amostro a Moshe Rabenu. Todo ya estava pronto de parte de El Kriyador. Una koza ke esta enkomendada de parte de El Kriyador no es derecho de akonsejar de afirmarlo o no.
Ma vemos en el Talmud ke El Kriyador se akonsejo kon Moshe Rabenu por la nominasyon de Betsalel. Moshe Rabenu le responde a El Kriyador, “Tu si lo vesh pertenesyente yo no te puedo dizir nada”. Le dize El Kriyador, “malgrado todo va akonsejarte i kon el puevlo i demándales”. El puevlo responde dizyendo El Kriyador, “i tu si lo vesh pertenesyete a Betsalel por fraguar el Mishkan, nozotros ke puedemos dizir?”
Kon dyes mandamyentos fue kriyado el mundo. I ke deprendimyento? Para dizir: “I desyerto kon mandamyento uno puedia ser por ser kriyado. Salvo, por panarse de los malos ke depyedren a el mundo ke fue kriyado kon dyes mandamyentos. I por dar presyo bueno a los djustos ke sostyenen a el mundo ke fue kriyado kon dyes mandamyentos”. Este paragrafo lo meldamos en el livro Pirke Avot.
Este paragrafo ke meldamos en el sinken perek nos enbeza ke El Kriyador por dar muncha paga a los Tsadikim, a las personas djustas, kriyo a el mundo kon dyes dichas mandamyentas ke el puediya kriyar a el mundo kon una dicha.
Por ke los tsadikim, las personas djustas sostyenen a el mundo? Komo dizen nuestros savyos, el mundo se sostyene sovre la ley i sovre el servisyo, i sovre la bienfezensya (dicha de Shimon el djusto) i Raban Shimon be Gamliel dize: “Sovre el djuisyo sovre la verdad i sovre la pas el mundo sostyene”.
El Mishkan, el santuvaryo ke enkomendo El Kriyador a Moshe Rabenu de fraguarlo mezo de Betsalel, senboliza a el mundo. Tambien el Bet Amikdash ke fraguo Shelomo Ameleh era el mundo de el Djudyo. Komo dize en el Midrash, todo lo ke egziste en el mundo egziste en el santuvaryo. Komo meldamos en la perasha de Yitro, “en todo lugar onde enmetaresh mi nombre, vendre a ti, i te bendizere”. Sigun la eksplikasyon de el sinyor Rashi, “en todo lugar onde enmetaresh mi nombre es el santuvaryo”.
El santuvaryo es yamado ‘Kol Amakom’, todo el lugar. I el santuvaryo es el lugar onde mora la Shehina de la divinidad. Si el mundo era un estado de el santuvaryo, el materyalizmo no podestava ni egzistiya malisya en el mundo, i todas las personas eran djustas. Dunke devemos ser djustos i amar a la djustisya. Komo dize en la Gemara de berahot, de el diya ke se destruyo el santuvaryo, la Tora nos mampara i devemos de estar syempre djuntos kon la Tora. Kuando egzistiya el santuvaryo la ara- el mizbeah onde se aziya los sakrifisyos perdonavan nuestros pekados, oy el pranso ke es ordenado sigun la ley nos perdona. Dunke onde nozotros lo yamamos, kon korason kumplido, a El Kriyador el nos responde. Syempre ke nos responda para byen.
