(A la fin de los tiempos, todas las fiestas de Israel, seran evenimyentos chikos, solo Purim se kontinuera a fiestar);
(A la fin de los tiempos, de todos los livros de la ley, solo la Tora i la Megila de Ester se kontinueran a meldar).
Mesajes sekretos, la megila entera es un kod ke entre sus linyas mos anunsya munchas kozas. Entre todas, el Sinyor del Mundo parese ke a siertas epokas se tapa la kara, ma en realita, esta siempre kon su puevlo regalado. La megila entera es un Seter (sekreto) tapado, i amostra fuersas kozmikas ke paresen aharvarsen entre eyas:
Mordehay-Djustisya-Monoteizmo
Aman-Negrigura-Totalitarizmo-Krueldad.
I enfin Ahashveros-Notralita ke es travado por las dos partes mos akodra de las Nasyones Unidas. En el tiempo de la sigunda Gerra Mondiala estas nasyones ke delantre de Aman kedaron kayadas i desharon Israel solo en su dezgrasya, mos akodra la kayades endinya del mundo libero. Durante los siglos de muestra istorya, tuvimos munchos Purimes…. Munchos Amanes mos amargaron, mirando a destruirmos, i muestra kreensya fue mas fuerte ke la sensya i la filozofiya del mundo ke se estuvo kayado delantre de muestra dezgrasya. Muestra fey fue siempre la baza de los miraklos ke mos kito de la foya i mos arebivyo. Si Hitler en 1942, saviya el mesaje de la Megila kuando disho “Los judios no van a fiestar mas dingun Purim”; si saviya lo ke lo asperava komo sus 11 generales ke ivan a ser enkolgados komo Aman i sus ijos, de verdad se iva enkantar, si mirava los nombres de los ijos de Aman en la Megila. Hitler iva ver ke tres letras de estos nombres estan eskritas mas chikas de las otras, el Taf, Shin, Zayin ke tienen una valor numerika de 400-300-7 lo ke aze 707. Lo trokaremos el anyo latino, adjustaremos el shifro fikso 239 mos da 946, ke es el anyo 1946!
Aman teniya diez ijos i una ija. Los diez ijos fueron enforkados i la ija se aviya echado por la ventana, suisidandose. La mizma koza fue kon los nazis. En el anyo 1946, en el Tribunal de Nurenberg, 11 jenerales nazis fueron djuzgados i les dieron penalita de muerte. Los diez nazis fueron egzekutados i uno, ke era Göring se suisido. La enigma era ke Göring era homoseksual, le aviyan topado vistidos de mujer debasho de su uniforma nazi. Djusto komo la fin de Aman. 2500 anyos antes Ester ya mos anunsyo el dekreto kontra los nazis tanbien kuando uno de los nazis, Julius Estreighen ke se fue a la forka en gritando: “Festival de Purim”. Estos biervos no son konsejas, se vieron eskritos en el Newsweek de akel tiempo, biervos ke paresyeron vinir del fondo de los siglos.
Ester, Hadasa, Istar, ke tiene el nombre Estreya de la demanyana, (Seher) tu prezensya este siempre biva en muestros korasones! Kuantos Purimes pasaron, kuantos Amanes mos amargaron, kuantos maldichos mos aharvaron i nunka pudyeron eksterminarmos. Purim alegre kon sanedad i repozo.
