Estanbol i la Turkiya son una sivdad i un payis bastante enteresantes. Solo en Estanbol puedesh topar miles de inskripsiones eskritas en diferentes linguas. Dos investigadores, el Profesor Emre Öktem i Mesut Tufan pasearon Estanbol entero para topar miles de inskripsiones en la sivdad. Eskritas en diferentes linguas. Otomano i fransez, ebreo i fransez, grego i ermenesko; latin i fransez… El Profesor Emre Öktem es el otor de un livro “Los sekretos i los eskondidos de Estanbol”. Un livro publikado por una kaza de imprimeria fransez. I durante tres mezes bushki ande puediya merkar el livro. Ma reelmente es un livro bastante enteresante i ya puedesh topar syertas kozas sovre muestra sivdad ke nunkua aviash sintido.
La mueva direksion del Kal de los Frankos dyo karar de organizar una seria de konferensias para aklarar syertos sujetos a los Estanbollis, djudio o no. Este alhad era la segunda reunyon i serka de 40 persones vinieron a la Sinagoga Italiana. El titolo de la konferensia era sovre el livro publikado por la Kaza de Edisyones de la Munisipalidad d’Estanbol. Verso la fin del anyo pasado publikaron buen karar de livros sovre Estanbol: “Estanbol diya por diya”; “Las inskripsiones en munchas linguas en Estanbol”; “La Istoria de los sinemas d’enverano en Estanbol”; “Estanbol i sus kazales” ; “Estanbol i sus artes de sus kayes”; “Las komidas de muestra sivdad, del pasado asta los diyas aktuales” i un alay de livros ke se pueden publikar por una kaza de edisyon ande el profito materyel no es muy emportante.
En este livro topamos mizmo syertas fotografias i inskripsiones ke fueron travadas i tomadas de los simiterios Djudios de muestra sivdad. I es muestro amigo Albert Modiano ke les ayudo bastante, i tomaron syertas tombas del Simiteryo Italiano. Dospues de este livro, los dirijentes entendyeron la valor de sus simiteryo i estan lavorando para pueder azer tures turistikos en el Simiteryo Italyano. No se si lo savesh; esta komunidad fue formado por los Djudios ke tenian nasyonalidades frankas: italyana, franseza, otrishiana, inglesa, espanyola… Lo ke se es ke el Kont de Kamondo dospues ke avrio la primera eskola laika en Hasköy fue eks-komuniado por syertos hahames fanatikos i el formo una mueva komunidad tomando la permision del Rey de Italia. I es por esta razon ke kuando se melda la orasion de “Anoten” en el kal de los Frankos rogan para la sanedad del Prezidente del estado Turko i de los Italyanos. Reelmente muy enteresante.
Esto todo puedeser no tyene dingun dariaver kon la konferensia ma se deve de saver. I vos rekomendo de merkar este livro a lo manko para pueder meldar syertas sesyones.
Para eskapar mi artikolo no vos va kontar lo ke me afito en un Diya Internasyonal del Ladino. Me fui en primero al simiteryo de Ulus para transmeter syertas inskripsiones en djudezmo ke se topavan en las pyedras del simiteryo. I unos kuantos puntos dospues todos en la sala empesaron a manifestar sus deskontentes porke no kerian sintir nada sovre la muerte i fui ovligado de abashar del pupitro sin eskapar mi avla!
