Anna Eskinazi
Evenementos ke mos yegan por la Medya, haberes ke mos vyenen kon via vizual i munchas vezes yenas de sansasyon, tienen una influensa negativa i mos estan trayendo sar a muestra alma i a muestros pensamiyentos
La mayoriya de todas estas notisyas sin duda deven de ser konosidas, ama sin tomarlas en konsiderasyon, sin estar seguros de sus provenensyas.
Segir los haberes es una nesesidad por muestra vida de kada diya. I sin estar afuera de lo ke pasa, haberes de arte, de la natura, de los sujetos sosyales, de los dokumentaryos ke mos amostran las tradisyones etranjeras, es una alternativa ke mos aze avrir el orizonte i mos aze ser mas tolerantes.
Kuando no estamos en pozisyon de yegar a un buto determinado personalmente, devemos de topar una asosyasyon ke se okupa sovre el sujeto. Ayudar kon todo lo posible, i konoser las koordinasyones egzaktas es primordiyal. Empesar el diya sin tener palpitasyon de korason, azer todo lo posible en oras malas, sin estar debasho del pezgo de no sirvir, bolar a un mundo de illuzyones, ferahladeyar komo las olas ke fishugan las kostas de una mar trankila, ir i vinir entre la realidad i la irrealidad, es komo yegar a lo mas largo de los minutos i segundos.
Las notas de la muzika ke te brodan tu alma komo una dantela fina, i ke te eskonden detras de las nuves rozadas, ves ke los malahim te alevantan tu korason a las ermozuras sin fin.
Kuando el momento dezaparese, ves ke no te kedo nada en la mano, la konosensya se desho ir komo vagabondo al vaziyo. La vida, el bivir, es solo esto. Un sentimyento ke te aze korrer sin demanda al inkonyito. No puedes salvarte de los pensamyentos ke paresen ke no se pueden resolver; te kansan el meoyo. Empesas a sentir una enimistidad espantoza yena de ezgrimo kontra eyos.
Estas en vida, syentete orozo, syentete pozitivo, trankilo, respira profundamente. Sonriye, remersya, alegrate, amate, apresiya las ermozuras i atraversa los obstakulos. Ansi te sentiras mas mijor. Las relasyones sosyales son mas ke emportante. Remarkar los sentimyentos, aresentar los ke toman un kamino negativo kon aktividad fizika, kon komportamyento i pensamyento pozitivo. Azer todo lo posivle para mantener el moral alto, aktuando kon grande saviduriya, kon lavoros de valor, oriyentarse verso los butos benefisyozos i ambezarse kozas muevas.
Estas son los faktores primordial para mantener la memorya aktiva. Afilu alevantarse de la siya, azer un torno aryento de kaza, ser voluntaryo en una ovra de byenfezensya, reenforsa pozitivamente muestro moral, mos aze sentir mas orozos. Dar, mos prokura a mozotros i al entorno grande felisidad.
