Ke elegante flor es la mimoza. Estos topizikos amariyos bivos paresen ponponikos de seda. En Marso kuando mos vamos a Büyükada, en primero mos viene su golor delikada i despues la vemos kaje en kada guerta. Malorozamente ay personas ke no saven la valor ni tienen la konsiensia de la natura.
En el anyo 1946, la Italia aviya salido muevamente de la gerra ke destruyo kaje la Evropa entera. No solo destruyo las kazas i las sivdades, tanbien destruyo i las almas de las personas. Las personas estavan bushkando un kamino para topar una esperansa para la vida. Ansina 3 mujeres ke eran miembros de “La union de mujeres italyanas” pensaron ke iva ser posivle en fraguando de muevo la sosyeta kon la solidaridad de las mujeres. Estas tres mujeres fuertes eran Teresa Mattel, Rita Montagnana i Teresa Noce. Estas tres mujeres forsudas kijeron topar una flor simbolika. Entre todas las propozisyones, kedaron a la fin, tres flores. La Klavina, la Anemona i la Mimoza kon su golor maraviyoza.
Eskojeron la Mimoza grasias a sus karakteristikas:
1- Por su kolor amariya ke da alegriya a los ke la ven.
2- Porke avre en Marso, ke es el mez del diya de las mujeres i tambien semboliza el diya de las Mujeres.
3- No tiene de menester de muncho kudio i muncha pena asta ke se aze arvole grande. Auguraron tanbien ke la Italia se alevante sin muncha pena, komo este arvole.
4- I lo mas emportante, porke es un arvole muy rezyo komo las mujeres, malgrado ke se ve muy delikada. Reziste i enflorese en todo modo de kondisyones jeografikas difisiles.
De akel tiempo en delantre espasialmente en la Italia i en la Rusya se ofre esta flor, la mimoza el 8 de Marso, ke es el diya de las mujeres. Las mujeres resiven no solo de sus maridos, amantes o ijos ma tanbien de sus amigos porke esta florizika semboliza la solidaridad.
Kuando konsideramos las karakterístikas de la mimosa i su lugar en la literatura mundial, puedemos dizir ke esta flor tiene estos sinyifikados: Solidaridad, immortalidad, delikateza, entuziazmo i esperansa.
Agora vos kero kontar un evenimiento ke bivi unos kuantos anyos antes.
Un anyo bivimos en Büyükada en una kaza ke teniya una guerta muy ermoza i en esta guerta se topava djusto delantre de la kaza un arvole maraviyozo de mimoza. Era un arvole de munchos anyos, alto i ancho. Mozotros moravamos ariva i abasho morava una kuzendera. Las flores entravan asta el balkon muestro. Al anyo sigiente vimos ke el arvole se seko. Mos izo muncha pena. Le demandi a la kuzendera deke es ke se seko este arvole. No vos vash a kreyer. Me disho ke es eya ke seko el arvole en echandole kezzap (vitriolo) a la raiz. Le demandi la razon. Disho ke estavan kayendo las flores en basho i despues estavan entrando tanbien ariento de la kaza i estava aziendo suzyedad. Ma komo en Büyükada es defendido de kortar arvoles sanos, lo seko por entero i ansina tuvo derecho de kortarlo. Todo modo de personas ay en el mundo malorozamente.
FELIZ 8 DE MARSO, DIA ENTERNASYONAL DE LAS MUJERES.
