Tenemos una gata en kaza. Kuando la yamamos no vyene. Solo kuando eya kere, se mete sovre muestras pyernas. Kuando ve ke estamos en la meza para komer, ya se mete en la tresera siya komo musafira. Al pareser ke los gatos son los primeros animales ke se izyeron de kaza desde miles de anyos. Se kreye ke se aserkaron del umano para aferrar ratones. La jenetika de los gatos ke los arkeologos toparon en el Medyo Oriente, en Evropa i en Afrika, mos mostro ke el primer gato salyo de Turkiya aze mas de 10.000 anyos. En Kafrisin (Kıbrıs, Cyprus) enkontraron una tumba de 9500 anyos atras, ande el ombre i su gato estan eterrados uno al lado del otro. Lo ke es enteresante es ke los gatos supyeron muy byen viyajar de un lugar al otro a traves de barkos ande los yevaron para ke aferren ratones. Es ansi ke enkontraron el DNA de gatos de Ejipto en la tyerra de los Vikinges, al norte de Almanya. En China, en una tumba de 5300 anyos atras, se vyeron guesos de gato enterrados al lado de umanos, mostrandomos, ke los gatos aziyan parte de la famiya umana.
Una amistad muy kuryoza topamos en la kultura de la epoka de los Paros, en Ejipto antiguo, ke algunos gatos fueron momifikados i otros fueron degoyados komo ofranda en los templos. Yene dizen ke los gatos de Ejipto salyeron de Turkiya para irsen aya.
En Ejipto tanbyen enkontraron un simenteryo vyejo de mas de 2000 anyos, organizado solo para gatos, ande enterraron gatos kon kolyares de fyerro o de piedras presyozas. Segun el famozo istoryador Herodot, los ejipsyanos se arapavan las sejas en respekto al dolyo de la muerte del gato familyal komo sinyo de Kriya. En 2018, uvo una ekspozisyon en el Muzeo Smithsonian del Arte Asyatiko en Washington, D.C. sovre la importansa de gatos en Ejipto Antiguo. Aya mostraron ke los gatos pueden ser de un lado protejadores, del otro lado endependentes i malos. El interes ke teniyan por los gatos mos aze pensar ke ratones i serpyentes eran la unika razon de mantener gatos.
Komparando gatos i perros, vemos ke los perros tyenen munchos roles alora ke los gatos sirven a dos kozas: apanyar bestyas komo ratones i ser bestya de kompanyiya. Kuando mos vamos de kaza por unos diyas i ke deshamos la yave a una persona konosida para ke la kudye, esta persona nunka ayega a ver muestra gata porke se eskonde asta ke se syente sola. Es ke los gatos aborresen los ke no son de kaza. Munchas vezes pasa oras eskondida en un almaryo o debasho de un mueble. Al pareser ke los gatos pueden resintir las emosyones de sus amos i ke tyenen una vision muy fuerte ke les permete de ver 6 vezes mijor ke el umano en lo oskuro. La syensya mos amostro ke los gatos ayudan a abashar el ritmo de korason, la tansyon i maneras negativas de sus propriyetaryos.
Si keren tener un gato en kaza, azer atansyon a la kozina, porke el gato es un buen ladron. No se espanta de gostar todo i por esto se mete a la meza kreyendo azer parte de la famiya.
Fuente: Live Science
