Eve Penso/Paris
Esto eskrivyendo un livriko de memoryas de familya.
Son konsejikas kurtas ke se puede meldar una por una.
La Tante Frida i las ermanikas Suzanika i Sara
Esta istorya me la estava kontando mi kerida Tante Frida. Era una mujer muy ermoza, se vistiya muy shik i era mujer de kavesa...
La Tiya Frida teniya unos kuantos anyos de mas ke mi madre.
Mi madre i su ermana Sara se pasavan manko de un anyo i eran komo buchukas.
Un dia, la tiya Frida ke era mueva novya deviya salir kon su novyo, el tiyo Édouard, porke aviya una fyesta kon los amigos en onor de los novyos.
Su madre, la Gramama Ester, le avia echo kuzir un ermozo tayor, merkaron una ermoza bluza kon dantela echa de mano, kalsados kon la chanta de la mizma kolor i un ermozo chapeyo ornado de un pashariko...
La Tiya salyo del berber i kaliya ke se apareje para salir. Asegun salyo del banyo para vistirse, no esta topando nada!
Puede ser ke la madre los kito de este lado para guadrarlos?
La yama a su mama, ma Ester no aviya tokado i se esta mirikiyando.
Estan bushkando en la kaza entera, puede ser la mosa los metiyo en un otro lugar?
En supito, la Gramama, de la ventana, esta vyendo las dos perrikas Suzanika i Sara ke se estan guadrando detras de los arvoles, vistidas una kon el chapeyo i kon el tayor, la otra kon los kalzados, la kamiza de dantela i la chanta.
Eyas kijyeron vistirsen komo una ermoza dama kon las amigitas...
La Gramama se sta inchendo de malo, i la kara se le izo amariya.
La Tiya vido su mama asi, i tornandose vido sus ermanikas de la ventana, ke se estavan guadrando. La tiya desido de azerse la ke no save nada...
Le disho a su madre:
"Mama, yo me arepinti de meterme este vistido. No te vekses, penso ke el vistido korolado va ser mijor para esta noche, el otro lo va guadrar para otra vez.
Asi, era mi tiya Tante Frida (la yamava asi) i las perrikas, mi kerida madre i mi tia Sara siempre se vistiyan de la tante Frida en sekreto...
Tu deves entender ke la keriyan muncho i keriyan azer komo eya. Era solo Amor de dos ermanikas chikitas.
