Durante la festividad de Purim, selebrada la semana pasada, los Djudios del mundo entero fyestaron kon alegriya la salvasyon del puevlo Djudio de la anihiliasyon fizika. Achakes ke Aman teniya una influensa tan grande sovre Ahashverosh, el rey de Persia-Media (un imperio ke abrasava la grande mayoria del entonses “mundo konosido”), el masakro de todos los Djudios estava iminente. Ma grasyas a Ester i Mordehay, esto fue evitado mirakolozamente. I sovre esta salvasyon, su selebrasyon se izo ley para todos los Djudios, para todos los tyempos asta la eternidad. Ma, de otra parte, a lo largo de la istorya, los Djudios vinieron frente kon frente kon otros masakros, todos evitados, ma dinguna en la grande skala de Purim, lo ke rezulto en la implementasyon de varias selebrasyones lokales ke se yamaron de fakto, Purim. Uno de estos es el de Narbonne, Fransya.
Para los Djudios de Narbonne, Fransya, el 21 de Adar 4996 (29 Febrayo de 1236) probablemente empeso komo kualker otro dia. Demprano la demanyana, un Djudio, sin nombre, deskonosido en los anales de la istorya, empeso a diskutir kon un kliente kristiyano en el kurso de sus negosyos normales. La diskusyon se troko en pleto, en medyo de palavras i gritos, empeso la violensiya, i el Djudio firyo fatalmente su adversaryo.
Pletos i aksidentes en las diskusyones pueden afitar. Ma, en la Fransya medyeval, la muerte de un kristiyano en las manos de un Djudio teniya konsekuensas seryozas. Ansi, los Djudios de Narbonne, ke aviyan empesado el dia kon tanto normalidad, en unas kuantas oras se vyeron konfrontados kon una djentorya furyoza. El primer a ser atakado fue el Rabbi Meir ben Isaac de Narbonne, su kaza fue destruyida i su bibliyoteka, una de las mas importantes de la epoka, fue sakajada.
Kuando arivo enfin el governador de la sivdad, Don Aymeric, la povlasyon kristiyana de la sivdad aviya sakajado un grande nombre de las propiedades de los Djudios de Narbonne. Grasyas al Dyo, antes de ke se empese una viyolensiya fizika, una matansina kontra los Djudios, Don Aymeric i su armada restoraron el orden en la sivdad. No solo evito un masakro, sino ke afilu ordeno ke las propiedades Djudias fueran rembolsados a sus lejitimos proprietaryos. Entre otro, se arekojyo los livros de la biblioteka de Rav Meir ben Isaac i restorados.
I ansi, se establesyo uno de los “Purimes” mas antiguos, konosido agora komo Purim de Narbonne. Este kavzo fue eskrito por Rav Meir ben Isaac en su livro “HaMegilla” i Rav Jonathan Hacohen de Lunel, un savyo de la epoka de Narbonne, lo transmityo.
