Keridos Lektores,
Oy vos va eskrivir una istorya verdadera ke paso por la kavesa de mi amigo, Moris LEVI antes munchos anyos.
El es una persona presyoza i entelektual ke ya eskrivyo tres livros enteresantes fina oy. El es el Vis-Presidente de la Komunita Djudiya, se enteresa en la Istorya kon la Literatura i es un eskrivano de kuentos.
Yo traduizi esta istorya ke tyene un mesaje emportante.
“Despues dos anyos ke se derroko la Unyon Sovyetika, en invyerno mos fuimos kon mi haver endjuntos a una egzibisyon en Ukrayna, para ekspozar los botones ke produizimos. Malorozamente mos fuimos en vano, porke no aviya dingun endustrial o emprezaryo ke merkava muestros botones. No aviya ni moneda, ni nada en la djente.
Mizmo a un alto fonksyonaryo, se le pagava solamente 10 dolares al mez. Dingunos no teniyan el poder de merkar produktos trayidos de Turkiya.
Miles de personas viniyan muy temprano en el friyo de menos 20 grados i se metiyan a la kola enfrente de las puertas del panayir, solo para ver los produktos.
Mozos kon mi haver tomimos dos siyas al lado del stand ke teniyamos i empesimos a mirar los ke estan pasando delantre de mozotros.
Las mujeres kon chapeyos de samarras, los mansevos enkantados de ver tantos produktos, i las kriyaturas estavan mirando kon grande kuryozidad a lo ke ekspozimos.
Djusto en el stand denfrente, un merkader aedado de Estambol, estava penando a vender chantas de kuero de mujeres a 50 dolares la una.
Esto era emposivle. Las mujeres emosyonadas estavan tokando las chantas i se estavan fotografeando kon eyas ma muy tristes de no pueder merkarlas.
El vendedor tambyen estava triste. Estava pensando a las devdas ke teniya i ke deviya de pagar a la torna de su viaje i komo va yevar las chantas atras sin desilacharsen.
Un dia una ijika blonda de 6-7 anyos kon kaveyos largos, kon los ojikos blus riyendos vinyeron al chantadji. La ijika vido una bolsa chika de kolores diferentes para meter minudos i lo amostro a su padre. Keriya ke el padre se lo merke.
El ombre riyendo le demando al vendedor ke kadar kosta esta bolsika. El vendedor avyo las dos manos i los dedos en respondyendo ke vale 10 dolares.
El padre tanto se inyervo, tomo kon ravya la bolsa de la mano de su ija i la metyo al lugar.
10 dolares akel tyempo era una fortuna para un padre de famiya ukranyana.
La ijika chika no era reganchona, aksepto i empeso a yorar en silensyo.
Todos no saviyamos kualo azer!...
El vendedor kuando la vido yorar, kijo dar la bolsa komo regalo a la ijika. La chika miro a la bolsa, despues miro a su padre i no la tomo. El padre la tomo de la mano i empesaron a irsen. El vendedor avlando en franse i en turko les disho:
“Vos esto rogando, toma la bolsa, lo esto azyendo regalo”.
El padre kon sinyos definidos disho ke es imposible i arrondjo la bolsa. El vendedor paso delantre de eyos i ensistyo muncho.
A la fin el padre ya le dyo la permisyon de tomar la bolsa.
La ukranyana tomo la bolsa i remersyaron kon el padre al vendedor en enklinandosen, la chika kon una sonrisa.
A la manyana mos espertimos kon la inyeve i mos fuimos al lado del stand. Kuando se avyo las puertas, los primeros ke entraron fueron el padre, la ijika, la madre i la nona ke vinyeron sin mirar a otros lugares, direktamente al stand denfrente. La ijika kito de una bolsa kuzida en kaza siguramente, kon muncha atansyon, una koza empaketada minusyozamente i riyendose se lo dyo al vendedor.
El ombre kuando avyo el papel, vido una kuchara de tavla ke la ijika probablamente aviya pintado toda la noche.
Enriva la kuchara aviya pintado el nombre i la amblema de la kompanyiya de chantas.
El vendedor aedado miro la kuchara, miro, miro, despues mos miro i se guadro los ojos porke le tomo un impo de yoro, i empeso a yorar…
Abraso al padre i a la ijika komo unos myembros de su famiya.
Despues mos disho: “Esta djente no tyenen paras, ma tyenen kozas ke valen mas muncho de paras, estash vyendo?”.
En este viaje gastimos muncha moneda. A la fin ni el vendedor de chantas pudo vender chantas, ni mozos no pudimos vender botones. Ma, ganimos un rekuerdo inolvidavle i munchas lesones, ke son muncho mas valutozas ke la moneda”.
