Diya de martes, dospues ke se eskapo el Şalom de la semana pasada, vemos un twit del Sinyor İzzet Stamati ande mos esta kontando lo ke afito en un mach de futbol entre la Eskola Djudiya i la Eskola Amerikana de Üsküdar. Una eskola ke tyene raizes fuertes! Dospues del segundo gol, tres de los djugadores de la Ekipa de la Eskola Amerikana saludaron los djugadores de muestra eskola komo Nazistos, alevantando sus brasos derechos. Fue un shok para los elevos de la Eskola Djudia. I no se mizmo si alkansaron a eskapar el mach ke no era mas emportante. I empesando kon la media elektronika (tweets, facebook, instagram…) i dospues en los kanales de television, i mizmo en las gazetas las mas emportantes ke son publikados en muestro payis. Todos kritikaron los elevos de la Eskola Amerikana. Mizmo syertas personas Djudios propozaron de embiyar estos elevos al “March of Living” para ke se ambezen lo ke es “el Holokosto” i Auschwitz.
Kuando era presidente de muestra Komunidad mos fuimos a Ankara kon dos amigos para propozar al Ministeryo de Edukasion, para ke meten una lisyon sovre el Holokosto. I lo aparejimos. No reushimos a azer akseptar. En muestro payiz estan estudyando la Istoria de la Segunda Gerra Mondial a la lisyon dalkavo del liseo de Istoria. I kon la emosyon de los egzamenes para ser achetados a las universitas, esta lisyon no se trata. Ke desgrasia.
El Muzeo Djudio de Turkiya vyendo este menester, antes de este evenimyento, se adreso al Konsulato Olandezo para resivir un fono (Human Rights Fund) para pueder dar lisyones i konferensias a todas las eskolas empesando de Estanbol. Este modo vamos a pueder transmeter a los mansevos lo ke bivyeron los Djudios durante la Segunda Gerra Mondial.
El Ministerio de la Edukasion esta azyendo investigasiones para ambezarsen ofisialmente lo ke se paso en este diya. Dingunos no saven los nombres de estos mansevos enkantados por los Nazistos. Porke ya saven si tyenen en sus CV una koza asemejante no puedran estudiar en las Universidades Amerikanas.
Malorozamente dos-tres diyas dospues una ija en la Eskola Hisar (Eskola fondada por los diplomados de la Universita del Bosphor-Boğaziçi Üniversitesi) fue atakada kon syertas palavras antisemitikas. Otra desgrasia. Porke esto es un movimyento kontaminante.
Kero eskapar mi artikolo rengrasyando al Sinyor Ambasador Ehud Moshe Eitan, el Konsul Israelyano d’Estanbol ke lavoro en una epoka bastante difisil. Reelmente lavoro en esta epoka para ke las relasyones entre los dos payizes no sean mas negro. Le oguro reushitad en su muevo posto. I kero felisitar la Sinyora Hani Nahmias por su posto de Konsul General de Israel en Estanbol.
