Estamos pasando una perioda de insertitud mundial. Todos siendo diferentes, apartenemos al mizmo mundo i a la mizma biolojia, ma estamos divididos.
Estamos solo dispuestos a entrar en dialogo kon los ke apoyan muestras ideas, o kon ke kreyemos ke vamos a ser kapaches de konvenser. Este komportamiento mos esta yevando a un mal kontemporano, la soledad. Se estima ke desde el anyo 2023, el prinsipal problem del umano sera la depresion i la ansiedad. Devemos de esfuersarmos para pensar globalmente, i las kondisiones umanas deven de ser valorizadas por ensima las frontieras. No importa lo ke somos o de ande somos, importa sovre todo de ser umano. Estar en el lado korekto de la istoria es el dever de todos los ombres i las mujeres. Tenemos todas las kozes para sentirmos miembros de este universo majiko.
Estamos biviendo en una perioda istorika kuando el mundo esta konektado kon su internet, su transporte, su teknolojia i kada persona esta, mas o menos sensible a la politika, a la ekonomia, al kambio klimatiko, a los problemes sosiales para aktivarmos al bienestar de las futuras jenerasiones. La umanidad es komun i no devemos de olvidarmos ke este mundo, para mozotros, es komo el barko de Noah, no tenemos otro alternativo.
Mi grande ansiedad es los haberes de kada ora ke se repetan, enfluensan i dirijan muestros meoyos komo eyos keren i kreyen. No ay una sola i unika verdad en dingun sujeto. Mos estan aziendo olvidar a pensar, a kestionar i a investigar. “La mente es komo un parashut, fonksiyona solo si lo tenemos avierto” dize Einstein. Kada persona i kada meoyo es diferente i arepushar el meoyo a saver mas muncho sovre lo ke oyimos mos ayuda a ogmentar su fonksyon i a saver mas profundo. “Lo ke es korekto no es siempre popular i lo ke es popular no es siempre korekto” dize Einstein.
