Reb Kopel se ganava la vida vendyendo bokales de vodka i bira a las tavernas de su kazal en Likova. No era una vida fasil, kon las fuertes taksas ke el governo aviya metido a los judios, en el diziochen siglo.
Kada anyo, la demanyana antes de Pesah, Reb Kopel vendiya su hametz al uno de sus vizinos. Los rabinos aviyan metido una regla ke puediyan vender el hametz a un no judio. Los vizinos de Reb Kopel ya estavan enformados de este ritual. Kada anyo, Reb Kopel aziya un kontrato kon uno de sus vizinos, dizyendo ke vendyo todo el kontenido de su merkansiya por una suma igual a su valor real. Duspues de Pesah, Reb Kopel merkava el hametz atras.
Un anyo, uno de los vizinos tuvo una idea. ‘No merkaremos los bokales de Reb Kobel. Kuando va ver ke no los esta puediendo vender, mo los va dar debaldes’.
Kuando Reb Kopel chafteyo a la puerta de sus vizinos en la demanyana de la noche de Pesah, dingunos de eyos no kijeron merkar los bokales. No le tomo muncho tiempo para entender el djugo ke sus vizinos le estavan aparejado.
Reb Kopel no ezito ni un minuto. Metyo los bokales de hametz a su karreta, i se dirijo al riyo. Entremientes, sus vizinos lo estavan obzervando de leshos kon alegriya. Reb Kopel anonso kon boz alta: ‘Puedesh tomar todo, es debaldes’.
Akeya noche, Reb Kopel se asento al Seder kon un korason alegre. Todo su kapital lo aviya depozitado a estos bokales de vodka i bira. I una grande parte, los aviya merkado kon kredito. Agora, el dezmazalado kedo sin grosh. Ademas, teniya una grande devda por los bokales ke aviya merkado kon kredito. Los ocho diyas de Pesah, los paso kon alegriya. Ni un punto no penso a su devda. Ma agora, ya era la ora de tornar al mundo real.
Reb Kopel se dirijo a la butika por revizar sus papeles i azer un plano komo iva empesar su negosyo de muevo. En la puerta, rankotro un grupo de ombres deziluzyonados: ‘Mos paresyo ke keriyas liberarte de los bokales de votka i bira. Anonsates ke los puediyamos tomar sin pagar nada. Si es esto, deke metites estos perros aya komo gardiyanes para ke protejen los bokales?’
Durante la fyesta entera, noche i diya, las ventikuatro oras del diya, los perros no permetyeron ke dingunos se aserken de los bokales.
Reb Kopel se fue al riyo. Se sorprendyo kuando vido ke los bokales no estavan tokados. Se disho de si para si: "El Dio esta siempre al lado de los djustos’’.
