ITSHAK PERLMAN
El 18 de novembre 1995, el violonisto “Itshak Perlman”, en el salon de “Lincoln Center” en “New York”, suvyo a la shena para dar un konserto.
Ya savemos ke para el “salir a la shena” no es fasil i no se deve de menospresyar.
En su chikez, el fue atakado de una paraliziya i tyene en las dos pachas ateles para darle apoyo, puede solo kaminar kon la ayuda de bastones.
Es un spektaklo inolvidavle verlo kaminar a poko a poko i kon dolor, dando solo un paso kada vez. Kamina kon grandeza ma yeno de dolores, fina ayegar a su siya. Despues se asenta, mete los bastones en basho a poko a poko, avre los klipses de los ateles, arrepusha un pye asta atras, mete el otro pye delantre.
Despues enklinandose toma el violin den basho, lo mete debasho el menton, da un sinyo kon su kavesa al shef de orkestra i empesa a tokar el violin. Todos los spektatores son auzados a ver este ritual fina oy.
Kuando empesa a kaminar de la punta de la schena a su siya, eyos estan asentados kon grande silensyo. Eyos asperan sin tomar reflo i sin meneyarsen kuando el empesa a avrir los klipses de sus pachas. Asperan fina ke va empesar a djugar kon el violin. Ma, en akel konserto uvo una desgrasya. Djusto ke empeso a djugar, una de las kuedras del violin se rompyo.
Todos enkantados, mirando a la shena kon merikiya, empesaron a pensar lo ke va azer Itshak Perlman. Dos puntos despues, el serro los ojos i le dyo al shef de la orkestra un sinyo para ke ampese.
La orkestra empeso i Perlman kontinuo del lugar de ande kedo. Djugo kon una pasyon, un poder i una pureza ke nunka se vido antes.
Todos ya savemos ke es imposible de tanyer una pyesa senfonika kon solo tres kuedras. Todos lo savemos, ma akeya noche I. Perlman no kijo saver esto, lo refuzo.
Kuando termino, todos ke estavan en un silensyo mortal, toda la odiensya se alevanto en pyes i empesaron a aplodisar, gritando i en azyendo movimyentos para amostrarle komo les plazyo. Estavan todos muy entuzyastos.
El sonrio, se alimpyo la sudor de la kara, i mos izo un sinyo de silensyo i kon un tono muy repozado, fuerte i kalmo mos disho:
“Ya savesh, ke a vezes es un dover del artisto de topar la solusyon de kontinuar la muzika kon lo ke le kedo en la mano”.
Ke fraza tan poderosa!...
Del dia ke oyi esto, no me esta salyendo de la kavesa.
I ken save? Esto puede ser ke es un stil de vida?...
