La salidura de Ayifto es para la umanidad entera un simbolizmo de libertad, un konsepto de salvasyon, un salto afuera de un mundo de opresyon i de estrechura.
Winston Churchill tiene deklarado en uno de sus diskorsos ke "Lo ke el potente imperio Romano i la alta sivilizasyon i filozofiya de la Gresya Antika no pudo azer, lo izo este chiko puevlo aharvado i arondjado de todas las partes lo pudo kumplir, dar al mundo el konsepto de libertad".
Mozotros dimos el Shabat kon sus leyes de repozo i igualdad para todos. "Guadra el Shabat tu, tu ijo, tu servitor, tu esklavo i el etranjero ke esta en tu tierra, i mizmo el azno i el bufalo".
Muestra Tora dyo las leyes de la shemita i yobel repozo de la tierra kada syete a 49 anyos, repozo del lavorante, derechos iguales para todos, siervo komo patron, prove komo riko. Kada vez ke ay una salvasyon mirakuloza, una liberasyon del apreto se kompara a la salidura de Ayifto. Si pensamos a este fakto ekstraordinaryo, mozotros mizmo mos enkantamos. Un chiko grupo de la populasyon sale a la libertad malgrado el faraon, su armada, sus kastes, su Nil sakro i toma kamino verso la libertad.
Este fakto se tomo komo egzemplo por munchos dirijentes. Benjamin Franklin i Thomas Jefferson aviyan echo emprimar enriva del muur de la Amerika mueva nasida, esta figura. (Los ebreos traversando la Mar Kolorada, el Faraon kon su armada en el otro bodre de la mar, i Moshe kon la kavesa entornada de rayos de luz, su palo en la mano i los biervos eskritos son: Alevantar kontra los malos es obedeser al Dio).
En 1783, enriva de la kampana mueva del “Independence Hall” se eskrivio una fraza del livro Leviim: "Anonsamos la libertad totala para kada miembro del payiz entero".
Munchos ombres de sensya i filozofes anonsaron en sus eskritos ke tomaron biervos del livro del Egzodus (Bereshit) de la Tora komo egzemplo de libertad. Bert Katzi Nelson tiene dicho: “Pesah para los judios no es solo una fiesta si non ke la esperansa de la realizasyon de sus esfuenyo de libertad”.
Miles de livros, konferensyas se daron enriva de este tema, mozotros mensyonamos en todo modo de manera i tiempo la salidura de Ayifto. En la Shema, metyendo Tefillin, en el Kidush de Shabat todos ke vijitan la Amerika i se van delantre de la Statua de la Libertad, ven gravado en su baza los versos de la selebra poeta judiya Emma Lazarus i los versos eskritos en 1903 tomados de la Agada de Pesah: "Give me your poor". Komo savemos, "todo el ke tiene ambre venga i koma, todo el ke tiene de menester venga i paskue"… Mos akodraremos ke Pesah tiene kuatro nombres: Pesah fiesta de la Primavera, Fiesta de la Matza i Fiesta de la Libertad (Hag aherut Pesah), Mez de Nisan, mez de los Reyes i Festivales, Primer mez del anyo asigun el kuento de la Tora.
Auguraremos alegriya, sanedad, pas i repozo para todos en el mundo entero. Amen.
