El 8 de Marso era el diya de las mujeres. Dizyendo mujer, es emposible no remarkar el trokamyento de moda de las mujeres. Trokamyento entre las rejyones, epokas, kulturas diferentes, trokamyento de vestimyenta, de peynarse, de makiyarse, i munchas otras kozas.
İsabella Segalovich avla de las sejas de mujeres empesando por Ejipto i dize ke en la epoka de los Paros, las mujeres se pintavan los ojos i las sejas para protejarsen de la enfeksyon i de los insektos. Al pareser ke i oy en diya en syertos payizes de la Afrika ay mujeres ke sigen pintandosen komo antes, porke kreyen ke esta pintura las proteja espiritualmente.
Antes, en Gresya tener sejas godras simbolizava la saviduriya por las mujeres. En la “Ansiklopedya de Kaveyos” de Victoria Sherrow, esta eskrito ke empleyavan polvo de plomo i a vezes pedasos de pelos de kavra ke se kolavan al frente para darsen este ayre.
En China, se pintavan las sejas de munchas maneras komo largas, kurtas, delgadas, godras dependyendo de la moda del anyo. En el livro “5000 anyos de la vestimyenta chineza” Xun Zhou eskrive ke se metiyan entre las sejas plumas de oro, de plata o de esmeralda.
En la Evropa de la Edad Medya, las mujeres se arapavan o las aziyan tan delgadas las sejas ke paresiyan ke no egzistiyan. John Block Friedman eskrive ke en akeyas epokas los pelos del puerpo de la mujer formavan una sekana de alma i fizika para el ombre. A vezes empleyavan produktos kimikos ke aziyan salir lamparones al lugar de sejas.
En el siglo 19 en Fransya, para las mujeres tener sejas largas i oskuras era simbolo de Djuderiya i las yamavan “La Djudiya Ermoza” komo una aluzyon antisemitika. En las pinturas de Ingres sovre “la Baronesa de Rotchild” i “La Kavesa Djudiya”, se nota esta forma de sejas.
En la mizma epoka en Inglatera la moda era de tener sejas komo las de una ijika chika i inosente. Las sejas nunka se deviyan de tokarsen. El Dr. Thomas Sozinskey diziya ke “mas las sejas estan separadas, mas grande es el meoyo”.
La pintora Frida Kahlo, famoza por sus sejas, se dize ke simbolizava la Meksikana otantika.
El proverbo dize “No kites ojo, areglando la seja”: “Enderechando una koza no mallogres otra koza”. El 8 de Marso ke es el diya de las mujeres mos aze akodrar munchas kozas komo estas. Oguraremos a no tener delantre de mozotros mujer kon sejas enterogativas!!!!
Fuente: Isabella Segalovich
