La semana pasada vos konti bastante sovre el o los evenimyentos sovre “saludar komo Nazistos”. Para eskapar la semana pasada los elevos del Kolej Tarhan fueron a vijitar el Muzeo Arkeolojiko i en las eskaleras travaron una foto todos saludando komo nazistos. No esto dando dingun reaksion porke esto es un evenimyento ke no esto puedyendo entender. La semana pasada dospues ke los responsavles del Ministeryo de Edukasion egzaminaron las dos eskolas - El Liseo Djudio de Ulus i la Eskola Amerikana de Üsküdar - los diridjentes i los profesores de la Eskola Amerikana vinyeron a la Eskola Djudia para demandar pardon! I para realizar syertos proyektos endjuntos? Espero ke van a realizar.
Dos semanas antes avia una prezentasion en el Aksanat, sovre la piyesa de teatro ke fue munchas vezes djugada en Estanbol i otras sivdades: Kula '930. Es la sinyora Rifka Bihar Waldman ke izo una prezentasion en turko. Reelmente lavoro bastante para azerlo. Pekado ke desparte de Forti Barokas dingun artisto o lavorante tekniko no asistyeron a esta prezentasion. Entre las tres prezentasyones ke tomaron shena en diferentes anyos; avia diferentes artistos i mas munchos aktores ke tomaron rolo. La prezentasion dalkavo teniya un grupo de muzisienes mas profesyonales. La prezentasion duro mas de una ora i Rifka respondyo a las kestiones demandadas. No era dakordo solo sovre la muerte de muestra lingua: “El Djudezmo”. Syertas personas disheron verso la fin de los anyos '70 ke kalia azer unos Funerales para enterrar esta lingua. Ma no fue este modo. Es djusto ke en grande majorita no la estamos empleando komo una lingua de komunikasion ma si vos topash en la Büyükada en los dos klobes vash a oyir esta lingua. Es djusto ke estas personas no empleavan muestra lingua kuando eran mansevos. Ma es komo “ir al Kal”. Kuando vos vash a la sinagoga la mas grande partida son djente aedados. I estas personas no se ivan al kal kuando eran mansevos. Ma esto vyendo en el Kal de Şişli kada diya se topa entre 20 i 40 ombres ke vyenen para la orasion de Minha i Arvit. I dyes anyos dospues otras personas van a tomar el lugar de estas almas.
Karen i unas kuantas personas me estan demandando porke no publikamos 2 ojas kada semana en Judeo-Espanyol en el semanario Şalom. Yo se ke puedemos publikar. Ma devemos de saver si ay bastante djente ke van a meldar estas dos ojas. Le dishe a İvo Molinas, muestro shef redaktor, ke mos dize si ay tantas personas ke keren dos ojas en esta lingua ke mos embiyen e-mailes o whatsappes i este modo vamos a publikar dos ojas en esta lingua! Vamos a ver lo ke va afitar.
