Munchos anyos antes aviya visto un filmo en la televizyon. Puedeser ke akel tiempo la televizyon era sin kolor, no me akodro. Era la istorya de un sientifiko Mr. Carpenter. Este Mr. Carpenter un diya se fue al Pol Norte para estudiar la vida del Pol Norte. Ma el povereto se entezo i se kedo aya en un kanton. Munchos anyos despues, komo 50 anyos despues, un grupo de sientifikos se fueron aya para mirar la situasyon de los buzes. I lo toparon a este dezmazalado entezado. Pishin dieron haber a los lugares nesesaryos. Lo yevaron a un laboratuar para egzaminarlo i en lo ke se dezyelaron los buzes, se arebivyo. Los doktores kedaron enkantados. Mr. Carpenter les disho su nombre, ande biviya, su famiya i todo, ma sin saver ke kedo entezado 50 anyos. Kurto, despues de un tiempo lo yevaron a su adreso. Sonaron la puerta, una manseva avriyo la puerta, era su inyeta. Ni el supo ken es esta manseva ni la manseva supo ken era este ombre. Vos dizere ke Mr. Carpenter aviya kedado entakto djusto komo en el tiempo ke se entezo. No se troko del todo. Despues de un poko de tiempo vino un viyejiziko. Era el ijo de Carpenter. I ansina ampeso un alay de evenimyentos komikes. El viyejo lo yamava papa a este mansevo. Todos se enkantavan. Siguro ke en 50 anyos troko munchas kozas en la teknolojiya ke Mr. Carpenter no konosiya. Las kozas ke le vino a la kavesa por modo ke peryo 50 anyos en el tiempo. La politika, las paras, los otomobiles todo le estava viniendo muy tuaf.
Keridos lektores, agora en vezes i yo me esto sintiendo komo Mr. Carpenter. No 50 anyos, de una semana a la otra estan trokando las kozas. Los presyos, la politika, los evenimyentos i mizmo las personas i siguro la forma de la vida.
En verdad, el trokamiento es un fenomeno de este mundo. Todo troka, aparte del trokamiento el mizmo ke keda siempre en su lugar. Vos puedesh imajinar ke puediya ser la vida sin trokamientos. Tomaremos la vida de la persona, si no aviya trokamiento. Ke monotoniya terivle ke iva ser. Las kriyaturas, los adultos, los modos de bivir si kedavan komo el empesijo. Las sivdades, los payizes sin trokar. La sensya sin adelantar, dinguna diskuvierta mueva, La medisina de 300 anyos antes, kon las kuras de akeyos tiempos. Los modos de lokomosyon kon arabas travadas por kavayos, aviyones kon pervanes para pueder ir en 20 oras de Istanbul a la Evropa. Se puede topar munchos egzemplos otros, ma solo de imajinarlos mos se esta aboltando el meoyo. Lo ke eskrivi ya abasta para amostrar i entender la emportansa del trokamiento en todo.
En la media eskrita o odiovizuela bushkamos las enformasyones para ambezarmos kualo ay de muevo, de la demanyana a la noche, no de ayer fina oy.
I para eskapar un proverbo ke alava los trokamientos: Trokar kazal, trokar mazal.
