Anna Eskinazi
Kada una de las fyestas mos traye alegriyas, emosyones, palpitasyones i eksitasyones eksepsyonales. Las fyestas tienen una majiya muy fuerte. Kada umano toma la fyesta a su manera i la siente kon una profundidad diferente. El buto primordyal es de konsiderarse eksepsyonal en partisipando a las tradisyones familyales, kon el karinyo de estar todos endjuntos. Un sentimyento ke kayenta el korason i da una eforiya komo si fueran ijikos ajitados. La sonriza en los mushos empesan kon las preparasyones i kon una enerjiya inimajinable. El bel tomado, la kavesa tomada, las dolores i la kanserya dezaparesen en el kantoniko preferido kon el kafe i las piernas bien espandidas. La meza se prepara kon ardor, bien atakanada kon el mantel kolali byen spesyal i las flores perfumadas de todas las kolores en los vazos los mas presyozos ke alelumbran el entorno. Todo lo ke se empleya es spesyal para la fyesta i mos alegran los korasones. Asta la vestimienta es eskojida kon grande titizlik. Todo es bayramlik. Sin pensar a las fyestas pasadas kon muestros padres. En muestra era moderna devemos topar remedyos para kontentar los ijos i inyetos i aprovechar de los medyos modernos. Devemos de azer todo el posible para ser sinseros, karinyozos, i kedar feliz. Oyir las bozes de los kriyos ke se kazaron i ya no estan mas en la kaza, no es siempre fasil. Saver ke estan sanos i rezyos, ya es komo resivir el regalo el mas presyozo. Lo ke mos ambezan tambien las fyestas.
Estas son los komportamientos striktos ke trokaron kon el tiempo, i las etiketas ke desharon lugar a la manera mas “cool”, sin muncho protokol. Klaro todo kon karar, meoyo i sensya. Kale valorizar lo muevo kon empatiya i yegar al arte de la virtud.
La alegriya de las fyestas, la emosyon de los chikos, el sentimiento alto de onorar los aedados, se nota en el rekonosimyento de estos diyas santos. Mos akodramos de muevo ke kada momento deve de pasar en paz alumbrando los korasones. Leshos de ayin ara, de mala ora, syempre moadim alegres i saludos de alma i de korason.
