Este anyo, Jamie Lee Curtis, la ija del aktor judio, Tony Curtis gano el premio de la segunda artista, en el filmo "Everything Everywhere All at Once". Kuando resivyo su primer premio Oscar, en su deskorso, Jamie disho "Mi mama i mi papa fueron nominados a los Oscar en diferentes kategorias. Yo gani el Oscar". Sovre esto, uvo aplozos en el salon. La artista Stephanie Hsu tambien fue nominada en la kategoria ke Jamie Lee Curtis gano el premio. Hsu es una figura ke konosemos de la serya, "The Marvelous Mrs. Maisel", ande es la namorada de Mr. Maisel. En la serya, eya tiene la entisyon de azerse judiya.
El filmo el mas personal de Spielberg, 'Fabelmans', fue una desepsion. El filmo ke esta kontando la chikes de Steven Spielberg en una famiya judiya, fue nominado por siete premios Oscar, ma no gano dingun premio. La muevena nominasyon por El Mijor Direktor, Spielberg, este anyo fue el segundo direktor el mas nominado en la istorya de los Oscar. Lo ke es enteresante es ke Judd Hirsch mezmo ke teniya un rolo muy kurto, fue nominado por El Mijor Segundo Aktor del mizmo filmo. El ganador de un Emmy, un Tony i un Globo de Oro, el judyo Judd Hirsch, fue nominado a un total de dos premios Oscar.
El padre de la talentoza kreadora del filmo ‘Women Talking’, Sarah Polley, es judio. Polley gano el Premio Oscar por El Mijor Senaryo Adaptado. Polley, es la eskritora i direktora de este filmo. El filmo es sovre mujeres ke son molestadas en una komunidad serrada i relijyoza. Polley supo muncho mas tarde ke su padre Harry Gulkin era produktor de sinema. Polley revelo esta istoria en su dokumental yamado 'Stories We Tell'.
El filmo 'Nothing New on the Western Front' esta kontando la istorya de la Primera Gerra Mondial de los ojos de los soldados alemanes ke fueron ovligados a gerreyar en negras kondisyones. Este filmo gano kuatro premios Oscar; El Mijor Filmo en Lingua Etranjera, La Mijor Muzika, La Mijor Fotografiya i El Mijor Direktor de Vizyon. El filmo fue nominado en mueve kategoriyas, inkluzo El Mijor Filmo. El produktor del filmo es de orijin judio. El livro en el kual se adapto el filmo, es un livro ke fue prohibido i kemado por los nazis. El livro fue prohibido porke estava amostrando la armada alemana insufizyente i estava amenazando el plan nazi de konkistar el mundo. El livro, del no judio Erich Maria Remarque, fue adaptado para el sinema en 1930 por el produktor judio, Lewis Milestone.
Este filmo, ke se estreno en Alemanya, fue etiketado komo un filmo judio por el prinsipal propagandisto nazi, Joseph Goebbles. Kon el orden de Goebbles, echaron bombas de olor a las salas de sinema ke estavan amostrando este filmo, i metyeron ratones a estas salas. Sovre esto, Alemanya i Austria prohibieron el filmo. El eskritor Erich Maria Remarque fue ovligado a deshar su nasyonalidad alemana. El Premio al Mijor Filmo de 1930 fue por este filmo.
Durante la seremoniya, la Akademiya izo la publisidad del Muzeo de la Akademiya, ke se inoguro el anyo pasado. El muzeo es sovre la istorya de Hollywood. Los emigrantes judios ke son los fondadores de los estudios de Hollywood, fueron komemorados en el video ke se amostro. Esto fue nesesaryo porke kuando se inoguro el muzeo, esta tema apenas se mensyono. Komo kijeron korijar este yerro, la Akademia aparejo una ekspozisyon del muzeo, solo sovre esta tema.
