De ande vino la shaka de Avril ke en Turko dizimos “el uno de Avril”, ke en Fransez se dize “ Pishkado de Avril”, aun no lo savemos mizmo ke desde muncho tyempo ya se pratika de parte de munchas kulturas diferentes, ama su empesijo es todaviya un misteryo. Es una forma de shaka ke kuando dizes al denfrente una koza ke no afito, i ke el denfrente se kreye, le akordras ke es la shaka de Avril. Unos istoryadores dizen ke este diya empeso en el anyo 1582 kuando el Papa Gregoryo troko el kalendaryo de Julian porke este kalendaryo empesava el anyo el primer de Avril i ke la fyesta de Paskua ke koresponde a muestra fyesta de Pesah, no kayiya kada anyo a la data egzakta, areglo i senkronizo el kalendaryo. Los Protestantes ke no aman a los Katolikos akseptaron este kalendaryo en el anyo 1700 i los Inglezes ke tyenen la Iglezya Anglikana, en el anyo 1752. Al pareser ke los payizes de fe Ortodoksa, todaviya no akseptaron el kalendaryo gregoryano por las fyestas relijyozas, asta oy.
Vinyendo al trokamyento del anyo 1582, komo no aviya el internet, el telefon, el sistem de posta, los haberes no yegavan muy presto de un lugar al otro i a los ke no teniyan haber i ke los konsideravan komo bovos, les kolgavan un papel en forma de pishkado detras de la espalda. El “Pishkado de Avril” simbolizava el pishkadiko ke se aferra muy fasil, i por las personas, los bovos i torpes.
Otros istoryadors dizen ke este diya vino de los Romanos ke selebravan la fyesta de Kibele o Sibel, la “Madre diyosa”, ande se vistiyan vistidos komik komo lo azemos en Purim, a la fin del mez de Marso i se burlavan de los dirijentes. Una kustumbre ke entro a la kultura romana al pareser de los Misris kon las leyendas de Isis, Osiris.
Una teoriya dize ke komo en Avril no era i no es permetido de peshkar, la shaka se aziya kon un papel en forma de pishkado el primer de Avril.
Por fin ay ken dizen ke este diya kedo de la selebrasyon del ekinoks de invyerno ande el diya i la noche son buchukes, iguales, lo ke okurre el 21 de Marso. Los Romanos se alegravan i se aziyan shakas. La palavra ekinoks vyene del Latin ande “aekuus” kere dizir igual, i “noks” kere dizir Noche.
Lo ke eskrivi no es una shaka de Avril, ama una parte de “Saver es Bueno”
Otra koza ke no es shaka de Avril, es ke les oguro una fyesta de Pesah a pasarla kon repozo, salud i alegriya
Fuente: Historya
