Anna ESKİNAZİ
Aze anyos komo buenos paryentes, desidimos de azer lo mijor posible engrandesyendo muestros kriyos.
Los dos estavamos lavorando para ser independientes i de mostrar a muestros padres keridos ke pudiyamos abasteser a todo, solikos i sin kualkiyer apoyo. Forsando muestro budjeto, topimos profesores de muzika al ijo i a la ija. Tienen tres anyos de diferensya. El pasha de ijo no tenia oreja muzikal, ama si entendemos. Metohanna. El deve de kontinuar i mostrar esfuerso. Violon i repetisyones sin fin. Geinam en kaza.
El profesor buena persona ama sufriya de diabet i esta hazinura aze la persona un poko inyervozo. Kada vez ke la asukar le abashava o le pujava, la boz del profesor suviya i el pashayiko de muestro ijiko, del grito altissimo kreshendo del profesor kaji ke le aziya kayer el arshe de su mano. Muestro ijo aziya todo su posivle para tener derecho el arshe ama las notas saliyan kon una kakofoniya anarshista.
El ijo no muy talentuozo i el profesor alokeyado, la vida de muestro virtuozo se termino kon una rapidez de staccato vertijinozo.
La Hanumika mas mazaloza, el profesor de piano era malah abashado de los sielos. Es asi ke después de munchos anyos ke fue a estudiar a los Estados Unidos, estas lesiones de piano le sirvieron muncho i entro a la Universidad kon grados altos. Agora kuando las muevas jenerasyones engrandesen sus kriyos kon las direktivas de los psikologos, puede ser ke les mostran kaminos mas derechos para ke yegen a sus butos. Ademas ke las muevas jenerasyones son mas independientes i la mueva teknolojiya les avre munchos kaminos muevos.
Kon lo ke trayen los anyos a la edad mura, se entiende muncho mijor ke la kompreansyon sinsera ke se amostra a los chikos en todas sus etapas, les aze topar el kamino de sus destinos. Siempre afitaran problemes ama enfrentarlas serán mas fasil para los ke fueron preparados kon amor. Asi los ninyos se akodraran ke las puertas de la kompreansyon serán siempre aviertas i los brasos espandidos kon ardor para abrasarlos.
La melodía dulse akompanyando la sinfoniya de la vida mos dara vitalidad i fuerzas para yegar a un futuro yeno de esperanzas muevas.
