Si vos estash harageaneyando de azer egzersizes, ke sepash ke los responsavles son “los intestinos”.
Es posivle ke vuestros intestinos vos ezvacheya de azer egzersizes o vos motiva. Puedeser vos viene komo torperiya ma esto no lo digo yo ma son los estudios de los sientifikos ke lo dizen. Si no vos plaze muncha aktividad o spor, es por modo de los mikrobiyoma i las floras de vuestro intestino. Las bakteriyas de los intestinos afektan el estado mental i mizmo la kualitad del esfuenyo en produizando norotransmisores ke trokan el umor de la persona komo la dopamina ke regula la alegriya, la felisidad, la gana de komer i el dezeo seksual.
Un estudio muevo se izo ensima los ratones o dizeremos los kobayes i se topo ke unas bakteriyas intestinalas pueden pujar la dopamina durante la aktividad fizika, i esto ayuda a provokar la motivasyon.
Estas investigasyones se realizaron ensima los animales de laboratuares. Kuando los investigadores bozdeyaron algun paso de la natura normala, komo matar las bakteriyas de los intestinos kon antibiyotikas, o blokar kimikamente la aktividad de los inyervos i la liberasyon de la dopamina, los animales koryeron mas manko. Esta investigasyon amostra ke la mikrobiyoma influensa la gana de azer movimientos. Las mikrobiyomas de las personas aktivas son muy diferentes de los de las personas ke no azen egzersizes. En los testes ke izieron ensima los ratones ke teniyan buenas mikrobiyotas, les dieron antibiyotikas i las bakteriyas en los intestinos se aminguaron. De sorte ke la voluntad para korrer de los ratones, se aminguo. Se vido ke el dopamin en el meoyo de los ratones normales, pujo despues de los egzersizes ma no en los ratones ke el mikrobiyoma se eskapo. Yani los ratones ke teniyan mikrobiyota buena, teniyan el nivel de dopamin muy bueno ma los ke teniyan poko mikrobiyotika teniyan el nivel de dopamin muncho manko.
Mikrobiyoma o mikrobiyota es la mueva definisyon de la flora de muestros intestinos. Al doredor de las mikroorganizmas ay 100 milyones de bakteriyas yamadas mikrobiyotas. Sus pezo total son 2-3 kg. La kuantidad de las bakteriyas de la mikrobiyota es 10 vezes mas muncho de la kuantidad de muestras selulas. Eyos biven en el intestino godro.
Kreyo ke es por esto ke kuando tomamos antibiyotikas, mos sintimos sin fuersas i no keremos ni meneyarmos de muestro kanton.
Diyas saludozos teneremos.
