En el mez de Avril, komemoramos la Shoa. Kije eskrivir sovre esto.
El rio Danubio se identifika, en jeneral, kon la sivdad de ande pasa, Budapest, Hungariya. Ma, este río fue enkonado verso la fin de 1944.
El 19 de Marso de 1944, la armada almana entro a la kapital de Hungariya, Budapest. Dos mezes despues, los Almanes empesaron a deportar los Djudios Hungaros i en Julio, 437.000 Djudios Hungarezos aviyan sido deportados, i la grande mayoriya de estos fueron asasinados en Auschwitz. El resto de los Djudios de Budapest se arekojeron en las kazas de la sivdad, todas identifikadas kon una estreya Djudia. Fue entonses kuando el eroiko “djentil djusto”, Raoul Wallenberg, entro en aksiyon para ayudar a salvar a los Djudios Hungarezos en distribuyendo dokumentos diplomatikos dizyendo ke los titulares (los Djudios Hungarezos) estavan debasho la proteksyon de la Suedia, un pais neutral. A saver ke la misyon de Wallenberg empeso el 6 de Junio de 1944, el mismo dia en ke los Aliados entraron a la Evropa i empeso la operasyon del Dia “D”.
Las deportasyones se aretaron en Julio. Ma, en el mez de Oktubre empeso a governar la Hungariya un muevo governo fashista pro-Nazi, dirijido por Ferenc Szalasi. En los primeros dias del governo, 600 Djudios de Budapest fueron asasinados i munchos otros fueron tomados para fraguar fortifikasyones para defenderse kontra la armada Sovietika ke se aserkava. El 8 de Novembre de 1944, ke koresponde al 22 de Heshvan, empesaron de muevo las deportasyones i sinko dias despues se establesyo un getto Djudio en Budapest.
El 2 de Desembre de 1944, la mayoría de los Djudios de Budapest ke no teniyan dokumentos de Wallenberg (o de otros diplomatikos) fueron konsentrados en el Getto. En Desembre i Enero, entre dyez o vente mil Djudios fueron asasinados por los myembros militantes del partido governante la "Kroche Flecha", i se aretaron solo kuando Budapest fue liberada en Enero. 565.000 Djudios Hungarezos muryeron en el Holokausto entre Marso i Desembre de 1944 i solo sovrebivyeron 120.000 Djudios de Budapest.
Munchos de los asasinatos tuvieron lugar kuando los myembros de “Kroche Fleche-Arrow Cross” metyeron en fila a los Djudios en el bodre del rio Danubio i los fuziyaron para ke sus puerpos kayeran al rio. Para komemorar a los Djudios asasinados en el bodre del Danubio, el 16 de Avril de 2005, el governo hungaro dediko a lo largo del bodre del rio, una kompozisyon "Kalsados en los bodres del Danubio", ke fue una kreasyon del direktor de sinema Can Togay (un sineasto Turko), i prezenta la skultura de Poder Gyula. El monumento se topa en el lado este del Paseo del Danubio, a unos 300 metros al sud del edifisyo del Parlamento Hungaro. El memorial es dedikado a las 3.500 personas, 800 de eyos Djudios, ke fueron asasinados en este lugar por “Kroche Fleche”. Estos fueron ordenados de kitar los kalsados antes de ser fuziyados.
En Enero de 2019, el ministro del Interior Israeli, Aryeh D'eri, anunsyo en Budapest ke los ajentes israelis van a bushkar los restos de puerpos en las aguas del Danubio i si topados, ke estos fragmentos seriyan enterrados en la Tierra de Israel. La organizasyon de voluntarios israelís, Zaka, tyene la intensyon de enbiyar aparatos kon dispositivos de sonar ke pueden abashar a una profundidad de 150 metros i skanear unos 130 metros para identifikar los restos de las víktimas.
