En la perasha Ahare mos ambeza el sirvisyo ke aze El Koen Gadol en el santuvaryo en el diya de la perdonansa Yom Kipur. Arambam, en la mishna, lo eksplika dizyendo ke kumplyendo su sirvisyo, lo akompanyavan asta su kaza, i aziya un banketo a sus keridos porke tornava a su kaza sano i rezyo.
El banketo ke aziya el Koen Gadol era porke no se danyo en el santuvaryo la ora ke el izo su sirvisyo. Un Koen ke no era pertenesyente por azer el sirvisyo de el diya de las perdonansas no puediya salir bivo de el santuvaryo. I por esta razon es ke el Koen Gadol no deviya alargar su orasyon, por no azerlos dezesperar a el puevlo.
El banketo ke aziya el Koen Gadol en su kaza le enteresava a su persona. El Koen Gadol deviya ser kazado i orasyonar por su famiya i no solo por si. Antes de el diya de las perdonansas se deviya apartarse de kaza i santefikarse. Kuando ya izo su sirvisyo ke ya fue resivido de parte de el Todo Poderozo, tornava kon alegriya a su kaza, onde su famiya.
El sirvisyo ke aziya el Koen Gadol en diya de Kipur era por santefikar a el mundo el este. Tomar la santedad de las alturas i abasharla en el mundo onde bivimos nosotros. Ansi en tornando el Koen Gadol a su kaza trayiya kon si la santedad a su kaza i a el mundo.
