Prof. Dr. Mois Bahar empeso en el anyo 1964 a su edukasyon medikal en la Universita de Estambol, en la Fakulta de “Cerrahpaşa”. El paso toda su vida akademika en la Fakulta de Medisina de Cerrahpaşa durante 47 anyos asta 2011, inkluida su espesyalizasyon en “Anesteziolojia i Reanimasyon”. En el anyo 1996, el fondo en la Turkiya, la “Asosyasyon de Nutrisyon” i fue el primer prezidente. Durante 21 anyos fue el Direktor de “Kuidados Intensivos” en el ospital Amerikano. El livro de alkavo ke eskrivyo es “AGUA”, “Aventura sin Fin” (SU, Bitmeyen Serüven). La agua es una aventura ke empesa en la tripa de la madre i kontinua sin interromparse la vida entera.
“El ombre peno muncho para entender lo ke es la agua, ma los misteryos ke no se pudyeron resolver de esta substansya immortal, kontinuan oy mizmo a konfundir los sientifikos. Este livro, mos esta azyendo konoser kon una perspektiva muy ancha, la AGUA i el AVER, ke son los elementos bazikos de la vida, i ke no se puede bivir sin eyos”.
Este livro eskrito kon un lenguage fasil a entender, esta prometyendo al lektor una vida mas konsyente i saludable kon la agua.
“Mois Bahar” eskrivyo una poezia sovre la Agua i yo la traduizi por vozotros, keridos lektores.
AGUA
Mobil u immobil
siempre korye
viyaja i troka
syempre el kamino de su kama
Mizmo ke parese ke esta durmyendo
syempre esta en varyasyon
en su propyo entorno
atado a su propyo.
Syempre en ekilibro
Sin trokar
Debasho la tyerra kuando es nesesaryo
En el ayre, en la mar, en la tyerra
Utiliza el ayre
Se troka en una nuve,
Se aze una gota
Se enteza, se aze inyeve
Su kolora es sin piadad
Kon una tempesta en la mar
Kon las inondasyones, los seles en la tyerra
Kon las tempestas en el aver
Kamina en el rio
Kuando se kansa
Se repoza en su propyo lago
Es el eskultor de los pinyaskos
Djuga kon las olas
Diverte kon los bruidos
Ke ay en la superfisiya
Bive de sus misteryos
A la naturaleza i a mozotros
Ofre su vida
Sin deshar a dingunos kon devda…
