Esta kantika ke en muestra chikes la kantavamos en la meza del Seder tiene una grande valor sembolika. El kavretiko flako, solo, arondjado i detestado en el puevlo de Israel donde su padre el Sinyor Del Mundo tomo a su lado por la eternidad, atandolo a el kon dos Levanim (las dos tavlas de la Ley). I los perros, vakas, kasap i otros fueron los enemigos de muestro puevlo, Imperios potentes ke miraron a kitarmos del mundo i ke se destruyeron los unos a los otros. Mos akodraremos del esfuenyo del grande rey de Babel, Nabukodenatsar ke fue enterpretado por el Profeto Daniel ke mos avla de la fin de los tiempos. El rey vido un esfuenyo ke lo desho tremblando i espantozo. Ma el se olvido lo ke vido i demando a los savios astronomes i konsejeros de topar el tema de esta vizyon. Dinguno no supo responderle lo ke vido el rey. Solo Daniel a ken el Dio le aviya dado la revelasyon de este esfuenyo i tuvo la kapasidad de enterpretasyon. El rey aviya visto en su esfuenyo una statua grande donde la kavesa era de oro, el pecho de plata, las anshes de kovre i las dos pachas de fierro, kon los piezes de barro. I una piedrizika chikitika ke no se save de onde vino chafteyo esta statua tan grande i pezgada i la izo siniza. La piedrizika se engrandesyo i se izo una grande piedra imensa. Esto es el tablo de los kuatro imperios potentes ke mos izieron bivir los kuatro Galutes de muestra istoria. Kuatro imperios ke se destruyeron, unos kon otros komo en la kantika del kavretiko, ke el solo kedo i kedara en pyes asta la eternitad. El primer de muestro galut (A.J. 536) ke mos destruyo el Beit Hamikdash, ke mos yevo 70 anyos en egzilo. Mos diziyan muestros enemigos apretandomos ke kantemos kantes de Siyon, “komo puedemos kantar, enkolgimos muestras harpas a los arvoles para no alegrarmos mas, no olvidarmos de muestra servitud”. “Si me olvido de ti, O Yerushalayim, ke mi mano derecha se tome i mi aluenga se apege a mi paladar, si no te meto Yerushalayim, ariva de todas mis alegriyas i todas mis ansyas”. Babel tan grande kon sus puertas ke nadan o puediya destruyir sus guertas suspendidas i su splendor fue destruyida por el Imperio Persano de Darius ke se espandyo asta las Indias i la Persya fue abatida por el Grande Aleksandre ke komo una tempesta, paso los Balkanes, la Asia Minor, la Siria, la Palestina espandyendo i derokando todo obstaklo. I la Gresya paso, Roma destruyo i mos izo bivir un Galut de dos mil anyos destruyendo en 70 de muestra era muestro sigundo Beit Hamikdash. I Roma paso kon su imperio, del Este fina el Oeste, porke sus pyezes eran de safra, ma el kavretiko kedo en pyes de la antikidad asta muestros diyas i nunka se esparesera, porke es el kavretiko regalado de su padre, el Dio Bendicho de Israel. El es su kavretiko ke lo merko su padre por dos Levanim (las dos tavlas de la Ley) i se lo ato a El, Dio Santo i Poderozo.
Kavretiko ke kontinuaremos a kantar simpre en esta mirakuloza fiesta de muestro Pesah.
Hag sameah.
