Vos dishe una semana, ma la realidad es las dos semanas dalkavos. Porke el Şalom no aparese solo dos vezes alanyo. Las dos semanas de Bayram muzulmano. Son dos fiestas muy emportantes para muestro payiz i la mas grande partida de la populasion, mizmo si no son muzulmanos, emplean esta epoka para las vakansas.
Es lunes el 24 ke empesimos a lavorar. I noche de martes (lunes a la tadre) resivimos en la Sinagoga de Neve Şalom serka de 550 mansevos ke biven en los estados de la Republika Sovietika; en la Rusia, en Azarbeydjan, en Giorgia, en Bella Rusia, en Estonia i otros payizes. Kuando vine al Muzeo, la kaye de Büyük Hendek estava yena de mansevos kon kipas i tsitsites. Estos mansevos fueron edukados durante un anyo sovre la ley Djudia i el Djudaizmo. I a la fin del anyo estan organizando un viyaje kon vapor a un payiz ke tyene una istoria bastante rika sovre su djudaizmo. I este anyo la Turkiya fue el payiz ke eskojeron. Dospues de un pranso ke fue ofresido por la Komunidad Djudia d’Estanbol, la seremonia empeso a las 19.00 kuando los dos granrabinos Rav İzak Haleva, el Hahambashi Turko i el Rav Berel Lazar, Gran Rabino de la Federasion Rusa entraron endjuntos al Neve Şalom. Dospues ke los dos Granrabinos izyeron un diskorso kada uno, se asenderon 6 kandelas en memoria de los Djudios ke fueron matados por los Nazis, por los ke piedreron sus vidas en los atakes teroristikos, i los ke muryeron en el mundo para salvar la vida de los Djudios. Kada kandela fue asendida por un turko de muestra komunidad i una persona del grupo. Dospues ke el Rav Sevi izo la orasion de ashkava por las almas de los ke se murieron en los atakes teroristikos, los rabinos ke estavan en la kavesa del grupo kantaron dos kantes. I la seremonia topo fin.
Vos kero avlar de la ekspozision ke tuvo lugar en el Muzeo Djudio el 16 del mez de Nisan. Esta ekspozision fue realizada kon el Sentro Cervantes d’Estanbol ke es enkavesada por el sinyor Fernando Vara del Rey, kon la prezidente de la Red de Djuderias. Reelmente mas de 250 personas estavan prontos para esta ekspozision. El chef, Javier Zafra estava pronto para eksplikarmos lo ke esta eskrito en su livro sovre “Las Savores de Sefarad-Los Sekretos de la Gastronomia Judeo-Espanyola”. Los ke vinieron a esta avyertura de la ekspozision fueron empresionados kon lo ke vieron. I todos mos ambezimos munchas kozas sovre las savores de Sefarad en Espanya. I todos estavan kontentes de pueder bever una shampanya “kasher shel Pesah”.
La ekspozision va ser avyerta durante un mez. Los ke vijitan esta ekspozision keren merkar livros sovre las komidas sefaradis porke no estan puediendo merkar el livro de la ekspozision.
Vos kero dar un otro haber. Los livros sovre las Komidas Sefaradis de Edirne se eskaparon. I devemos de publikar este livro en turko (tresera edision), en inglez (segunda edision), en Judeo-Espanyol (segunda edision) i en Ebreo (primera edision en Turkiya). El livro en ebreo fue trasladado i publikado por la İtahdut Yotsei Turkiya. Kero felisitar su prezidente Ovi Roditi Gülerşen i los miembros de la asosiasion.
Tenia otros tres sujetos para tratar, ma kreo ke vos va kontar la semana ke viene…
