El orijin del kafe es remontada a la Etiopia i fue deskuvrido en el siglo IX i grasyas a la globalizasyon, se konosio en el mundo entero. Dizen ke la primera kafeteria se avrio en Turkia en 1554, ma fue introduzido a Evropa en el siglo XVI por las primeras sivilizasiones. En el empesijo, kuando se empesaron a avrir los kafes en Evropa, fueron frekuentados por la aristokrasiya i los filozofos para enkontrarsen, trokar ideas i diskutir de la aktualidad. Estos enkontros ayudo a la djente de ganar un stil de vida, de informarse, deklarar sus opiniones i ideas i kontribuir al floresimiento de la kultura oksidental i del mundo.
Kon el tiempo, deskuvrieron tanbien ke bever kafe da una enerjia, alegria i motivasion a la persona. Ayuda a la dijestion, es nutritiva kon probiotiko i tiene antioksidanes. Se dize ke el kafe, es una droga legal la mas konsumida del mundo. Se izo el kompanyero el mas fidel del intelektual en la ora de su kreasion. Se asosia komo el stimulador del pensamiento, de la inspirasion i de la kreatividad. Munchos artistos, eskrivanos, sinematografes, desde su aparisiyon, se izieron adiktos de kafe, porke les ayudava a krear ideas orijinales i interesantes. Jean Sebastian Bach eskrivio una chika opera sovre el kafe “The coffee cantata”. Balzac eskrivio “Los plazeres i dolores del kafe”; el bevia 50 tasas al dia i yamava el kafe “el grande poder de mi vida”. Le ayudo a eskrivir 85 novelas asta ke murio. De esta droga legal, Voltaire bevia 80 tasas, Goethe bevia 60 tasas al dia.
En al anyo 1600, el Papa Clemente VII se vido ovligado de baptizar el kafe: “Esta bevida satanika es delisioza, sera pekado de desharla a los infideles, devemos de azerla una bevienda verdadera kristiana”. Meldando estas todas alavasiones al kafe, me esto diziendo si yo bevo 20 tasas de kafe al dia puedera eskrivir una novela, a lo manko? Bivir i ver…
“En lugar de kedar adurmesido, prefero sufrir en beviendo kafe” Napoleon Bonaparte
Unas kuantas istatistikas mundiales:
-Mas de 125 miliones de personas lavoran i biven de la produksion del kafe
-166 miliones de sakos de 60 kg de kafe son la produksion anual del mundo
-Brazil produse 30% del kafe total del mundo.
