Eve Penso
Kuando Ester i Eliya, mi nonos akseptaron de dar mi madre Suzanika a mi padre Raphael, la embiyaron kon vapor d'Estambol a Marsilya en Fransia.
Eya se deviya kedar antes del kazamyento ande su primo, Simon Musabak ke morava en Paris.
En enverano 1946, la gerra ya se aviya eskapado.
El novyo, mi padre, Raphaël, vino a tomarla kon su ermoza araba.
Se vieron este diya por la primera vez.
Mi Papa se namoro de mi madre de la primera mirada.
Mi madre vino kon su dota, 14 tapetes Bukhara, savanas, kolchas, platos, djoyas, vestimyentas...
Las validjas estavan inchidas de kozas luks asta ariva.
La araba de mi padre tanta se yeno ke fue ovligado de meter los tapetes i las kolchas en el topo.
Teniyan unas dodje oras de kamino antes de yegar a Paris.
Antes de irsen endjuntos, se fueron a un restorante ermozo, para komer i avlar.
Kuando se kijeron ir, no estan topando la araba...
Ay Dio santo! La buskaron kon la Polisia de Marsilya i la toparon en otro lugar mas leshos.
Ay Dio Santo!
La araba estava desnuda! Vaziya!
La dota de Suzanika se fuyo!
Ni un tapet, ni una colcha, ni una tovaja kedo!
La validjas no estan!
A Suzanika, no le desharon ni una kulot!!!
Los ladrones vazyaron la araba asta los paketikos de pipitas i de shamfustukes!
Nada, nada, nada! No kedava nada!
"Asi empezo la vida de Suzanika en Fransya".
En primero, fueron desesperados.
Mi madre teniya solo lo ke teniya ensima de eya.
Eya, konosiya la istorya de su famiya ke los echaron de Chanakkale desnudos...
El sinyor apiyadozo Dio, les aviya deshado la vida...
La dota? Los tapetes?
La vestimyenta? Las djoyas?
A la harafod ke se vayga todo!
Kapara!
Esto afito un anyo dospues de la gerra.
La vida era mas presyoza ke todas las paras del mundo.
Kuando arivaron a Paris, Suzanika se kedo ande su primo Simon Musabak.
La famiya de mi Mama izo el nesesaryo. I se kazaron unos kuantos mezes dospues.
El dicho de esta konseja es ke kuando afita una koza mala i ke estas sano i bivo, se dize kapara porke es El Sinyor del mundo ke te protejo, se dize: "Kapara, tu ke bivas!".
Este ensenyo de mi madre me da la fuerza de suportar todas las negriguras ke pueden afitar kada diya ke puedo avrir los ojos. En Fransez se dize "relativiser".
No mires ke piedrites munchas paras, avre la televisyon i mira las personas ke pyedreron sus famiyas, sus perros, sus kazas, todo...
Grasyas al Dio, mersi de darme ayre para respirar, pan para komer i salud, i ensima de todo el shalom... Mersi mamika, kerida madre, Suzanika de lo ke me ambezates...
Semana buena a todos.
