El 19 del mez de Avril en el CRR (un salon de konsyertos muy emportante para muestra sivdad ke fonksyona kon la munisipalidad d’Estanbol) avia un konsyerto kon el maestro Maxim Vengerov. Un violonisto muy famozo orijinario de la Rusia ma ke fue Israelyano i ke oy en diya bive en Monaco i ensenya en dos konservatuares muy emportantes. Un diya Maxim avlando kon los ermanos Ulucan (Birsen Ulucan, una piyanista bastante renomada i Özcan Ulucan, su ermano ke es un violonisto konosido en Turkiya i en otros payizes) les proposa de organizar un konsyerto ande no van a tokar las paras ke meresen i estas paras van a ser embiyadas a Hatay, la sivdad la mas influensada por el rash ke bivio la Turkiya el 6 del mez de febrayo, para los elevos ke estan dainda estudyando en esta sivdad. I Özcan Ulucan no savyendo lo ke devia de azer avla kon Murat Cem Orhan, shef de la orkestra senfonika de CRR. I el kon el shok ke bivio, porke Vengerov es reelmente un virtuoso muy emportante, acheto immediatamente. I dospues empeso a pensar si reelmente puedian realizar un konsyerto asemejante i lo realizaron. Avia una otra artista ke partisipo a este konsyerto: Sandra Lied Haga, violonista Norvejiana.
En el konyerto dos ovras de Brahms i Beethoven fueron interpretadas por el grupo. El Shef Murat Cem Orhan i la Orkestra Sinfonika de CRR akompanyaron estos artistos. I los espektadores les dyeron bastante koraje kon sus palmas. Rengrasyamos a todos los artistos por sus muzikas i por sus apoyo a los ke fueron influensados por el rash.
Es diya de Lunes a la tadre ke 550 mansevos edukados por los Hahames Habades ke biven en Rusia i en los vyejos payizes ke eran una partida de esta republika komo Rusia, Azarbeidjan, Georgia, Bella Rusia, Letonia i otros payizes vinieron a vijitar la Komunidad Djudia de Estanbol. Esta vez vinieron kon un vapor. Se kedaron 2 noches en los portes de la Mar Preta komo Sinop, i dospues vinieron a Estanbol. Noche de lunes estavan envitados al kal de Neve Şalom. En primero la komunidad Djudia les ofresio una komida kasher prezentada por La Casa ke es la kompanyia ke apareja todas las komidas kasheres para los aviones de Turkish Airlines. Antes de las 6 de la tadre, la kaye delantre el Neve Shalom estava yena de mansevos kon sus kipas i de mansevas. Este anyo avia muncho mas poko de mansevos porke una grande partida de los mansevos no tyenen la posibilidad de salir de la Rusia porke deven de ir al Askerlik si la armada tyene de menester de eyos. El anyo pasado, avia tres vezes mas de mansevos.
Dospues organizaron una seremonia en la Sinagoga ke empeso kon la entrada a la sinagoga del hahambashi Haleva kon el Gran Rabino de Rusia, el Rav Berel Lazar. Durante la Seremonia asendyeron 6 kandelas para los Djudios ke fueron matados durante la Segunda Gerra Mondial i para los ke se murieron para salvar la vida de los Djudios durante los 75 anyos dalkavo. Dospues de los diskorsos de los dos Granrabinos, el Rav David Sevi meldo una ashkava para los ke se murieron en estos evenimyentos.
