El sigundo alhad de Mayo es el Diya de Madres. No puede aver en el mundo una madre mas jeneroza de la madre judiya.
La madre judiya es tan protektora ke esto yega un grado eksesivo i konstitue un stereotipo ke puedemos topar mezmo en los livros de psikolojiya. Ma, antes de sitar los karakteristikos eksesivos de la madre judiya, kero sitar los motivos ke krearon este stereotipo.
Antes de todo, antes las kondisyones de las komunidades judiyas en la diaspora eran tan difisil ke las madres deviyan protejar sus kreaturas a un grado eksesivo. El antisemitizmo las forsava a suivar de serka sus kreaturas. Mezmo en estas kondisyones, los judyos reusheron. Esto es el merito de la madre judiya. La madre de Moshe le esta dizyendo a su ijo ke kale ke lavore dopyo de los otros para pueder tan reushido ke eyos.
Un orgolyo eksesivo en la reushita de sus ijos es el mas tipiko karakteristiko de la madre judiya. Mi ijo el avokato, mi ijo el doktor, mi ijo el enjenyor es un egzemplo umoristiko de sus avlas. El kantador, Allan Sherman dio el nombre "mi ijo el kantador" a uno de sus albumes.
La madre judiya forsa sus ijos a reushir en la eskola, en la vida i kuando vienen a la edad de kazarsen, los forsa a ke se kazen. Sus ijos por eya son dainda chikos mezmo si tienen sinkuenta anyos. Por eya sus ijos son dainda immatures.
Ay una dicha ke dize, "el ombre judyo ke tiene su madre en vida, es un mansevo de kinze anyos".
La madre judiya se ansyeya por sus ijos, no los desha azer lo ke keren porke eya egzajera los perikolos de la vida de afuera de kaza. Esto es la influensya de la vida en la diaspora.
Este sendrom de la madre fuerte es el rezultado de la filozofiya judiya tradisyonal. El ombre lavorando afuera de kaza i la mujer okupandose de su familya i del echo de kaza.
Las mujeres de oy estan lavorando afuera de kaza. Son muy okupadas i no pueden mesklarsen de la vida de sus ijos. Ma mezmo siendo tan okupada, la madre judiya no neglija sus ijos. Sus ijos vienen antes de todo. Eya ya topa tiempo a interesarse de sus problemes i forma una relasyon kayente kon sus ijos. Estos son los aspektos pozitivos de la kultura judiya. La kultura judiya da emportansa a la famiya i mas de todo a la kontinuasyon de la famiya.
