La semana ke vyene noche de Alhad (shabat a la tadre) vamos a estar endjuntos kon un grupo de Amerikanos ke estan aziendo un tur Sefaradi a la Turkiya i la Gresya i puede ser otros payizes. Reelmente va ser un grande plazer para mozotros de estar endjuntos. Noche de Shabat la Komunidad Djudia de Estanbol esta organizando un seder de Shabat kon la Sinagoga Etz a Haim de Ortakoy. I noche de alhad, un diya antes de las eleksyones nasyonales estamos organizando una nochada en el Otel CVK, Park Bosphorus. A esta nochada solo 120-130 personas pueden partisipar. Dospues del pranso tenemos el konserto de la famosa Sarah Aroeste kon İzzet Bana i las Estreyikas d’Estanbol. Kreo ke van a tener un sukseso bastante satisfazyente.
Reelmente no fue muy fasil para mi de dar karar para esta nochada. Un diya antes de las eleksyones munchas personas no keren asistir a un evenimyento asemejante. Ma komo no teniyamos otra posibilidad, achetimos esta organizasion. Si estash enteresados en esta nochada, puedesh bushkar a la Sinyora Emel Benbasat del tel 0535 3500778.
Esta semana, el 11 de Mayo tenemos una otra ekspozisyon de muestro amigo Alberto Modiano. Esta aprontando un livro i organizando una ekspozisyon. El titolo de la ekspozisyon ke va topar lugar en el Schneidertemple va ser: “Las 100 Karas Djudias”. Este mizmo diya vamos a fiestar los 40 anyos en la fotografiya de Alberto Modiano. El mizmo diya, la Komunidad Djudia Italyana esta organizando un konsyerto kon muestra amiga Renan Koen, piyanista bastante konosida en muestra komunidad i en el mundo de la muzika.
Para eskapar mi artikolo vos kero kontar de la konferensia ke topo lugar en la Ekspozisyon “Heritage” sovre la Erensia Djudia en İzmir. Son muestros amigos Nesim Bencuya i Tilda Koenka ke prezentaron este proyekto ke reelmente es muy emportante para İzmir i la Komunidad Djudia de İzmir. Estamos dando apoyo a muestros amigos Izmirlis por lo ke estan realizando i por sus esforsos.
