Anna Eskenazi
Todo empesa komo en el nasimyento, kon los primeros movimientos del bebe. El reflo ke toma el resin nasido es por la dada majika de la mano del doktor, o de la komadre. Teniendo el bebe de sus pyezizikos tan frajiles la kavesa por abasho en el ayre, se le da un chaketoniko al popo i a la espalda. Kon el primer grito i yoro del bebe entero kolorado, es el momento ke la famiya se alegra i sonriyen.
Mizmo ke la madre disimula unas lagrimas fujitivas, la ridayika brodada esta siempre pronta. Es una alegriya ke no se puede imajinar ni eksplikar. Una kanserya idilika ke empesa a pezar i dura kaji toda la vida. Para akumplir el trajekto, todos los momentos ke lo transforman son largos i yeno de punchones. Es un maraton ke dura toda la egzistensya. La parte manyifika es de estar prontos a yegar al final viktoriozo, saltando por todos los obstakulos. Es un suspenso ke los aktores de la vida keren savorar kon ardor. Tomar plazer de sus aktos revoltados es bivir komo una muzika klasika moderna ke es kompozada de notas kaotikas i ke se konvierte en una sinfoniya salyendo de su mundo profundo en reyonando entre las entemperiyas. La muzika se senkroniza entre las furtunas, i dezaparese entre las nuves. La kalma de la natura aparese de muevo. En los momentos mas duros, el sol aparese i alelumbra el sielo azuro. Todo troka i todo keda kalmo. Estar vijilante i en buen umor para kontrolar el moral es primordyal. No egzajerar en los momentos oskuros deve de ser el motto mutual. La moderasyon es la ley del ekilibro.
Las madres siempre se akodran de todos los detayes. El mundo komo regalo metyo un diya komemorativo yamado diya de las madres. Yo kreyo ke todos los diyas pertenesen a las Madres i punto. Diyas alegres i yenos de salud para todos.
