Si puediya ekspresar todos mis sintimyentos i mis pensamyentos, me gustariya dizirvos:
De dia en dia me esto engrandesyendo i trokando de karakter. Yo so vuestro ijo si, ma so una personalidad diferente. Tratá de konoserme i entenderme.
Puede ser ke vash a tener difikultades para segirme.
Dame la libertad en el djugo, la amistad i las aktividades. No tratesh de protejarme en todo modo de lugar, en todos los echos. Me ambezo mijor si veygo las konsekuensyas de mis aksyones yo mizmo.
Deshame azer mi echo komo kero. Si no, komo va entender ke me engrandesi? Mizmo ke kero muncho engrandeserme, de vez en kuando no me esto puedyendo detener de komportarme komo uno mas chiko de su edad.
Ya se ke no va pueder obtener todo lo ke kero.
Ma, kuando me estash dando todo lo ke kero, esto tomando.
No me desh palavras ke no vash a pueder detener. Esto peryendo konfiensa kuando no estash tenyendo vuestra palavra. Tratáme de una manera definida, desiziva. Limitáme kuando me estash vyendo ekstravagante. Oyíme, kuando vos demando demandas, es ke me kero ambezar. Las eksplikasyones ke me vash a dar, deven de ser kurtas i klaras.
No vos olvidesh ke me esto influensando mas muncho del komportamyento ke de vuestros konsejos.
Dame apoyo por mi reushidad. Mostráme ke tenesh konfiensa en mi. No me komparesh kon los otros, me dezespero akel tyempo. Yo ya se ke de vez en kuando vos esto desepsyonando. Ma keréme byen komo lo so, no komo lo tenesh en vuestra imajinasyon.
Si sosh kerensyozos i kompreansibles, esto ya me abasta.
Naser komo vuestro ijo no era en mi mano.
Ma, si teniya el pueder de eskojer, no kereriya ser ijo de dingunos mas ke de vozotros. Vos kero muncho byen.
Vuestro ijo.
Keridos Lektores,
Meldi este artikulo en un jurnal franses. Me plazyo tanto ke kije traduizirlo para vozotros.
Kedavos en la buena ora…
