El rey Charles III fue koronado Shabat, el 6 de Mayo, en el Monasteryo de Westminster i resivyo la korona endjoyada de San Eduardo en una seremoniya bazada en tradisyones vyejas, en un tyempo ke la monarshiya se esta esforsando a mantener su validez en Ingletierra.
Entre la boz de la trompetas en el monasteryo medival i los gritos de la kongregasyon, "Ke el Dio proteje el rey!", Charles fue koronado en una seremoniya a la kuala asistyeron mas de 2000 invitados, inkluzo lideres mundyales, aristokrates i selebridades.
El gran rabino de Ingletierra, Eduardo Mirvis, fue invitado al evento istoriko en Westminster, ma enfrentó el problema de komo ir aya diya de Shabat, porke no puediya suvirse al transporte motorizado. El rey Charles III rezolvo el problema, en invitando al rabino i su mujer Valerie, a pasar la noche en el Palasyo de St. James, ke es serka de Westminister.
Kuando los lideres relijyozos resitaron, todos endjuntos, el saludo ‘’Bienvenido’’ a Charles a la fin de la seremoniya, Mirvis no empleyo el mikrofono. La koneksyon judiya kon la seremoniya de koronasyon tambien fue realista: el rey i los soldados se vistyeron vistimyentas kuzidas por Kashket & Partners, ke es una kompaniya de shastreriya de propriedad judiya. La kompanyia Kashket & Partners kuzen las vistimyentas de las fuerzas armadas britanikas.
United Synagogue, ke es la union de las sinagogas ortodoksas britanikas, enkargo un muevo koro de kreaturas para ke resiten la orasyon "Adon Olam", i dedikaron esta orasyon al muevo rey. El Koro Shabbaton, un grupo ke azen inskripsyones para programes de radyo i televizyon, krearon una mueva versyon muzikal de la orasyon por Charles lll.
Munchas interpretasyones ortodoksas de la ley judiya, sostyenen ke los judyos no deven entrar a las eglisyas, ma los rabinos prinsipales pueden entrar, si el monarko demanda su prezensya.
“Tambyen tenemos echos de kada diya, ma la koronasyon tyene prioridad sovre todo”, disho el shastre Cheryl Kashket. “No ay nada mas importante de lo ke se esta pasando. Es muy emosyonante, i semos muy mazalozos de azer parte de la istorya”.
El rey Charles III prevenyo el prezidente israelyano, Isaac Herzog para kontinuar a bushkar una solusyon a la situasyon en la kuala Israel se esta enkontrando estos diyas. Herzog asiguro el rey ke "Israel es una demokrasiya vibrante’’.
La azete ke se empleyo en la koronasyon del rey Charles, se santifiko en Yerushalayim. La azete ke se bendizyo por el Patriarko, fue tomada de la Montanya de Olivas. El Archbishop de Canterbury disho ke todos los reyes fueron bendizidos kon la azete de este santo lugar.
