El 18 de Mayo se va fyestar “Yom Yerushalayim”. Para onorar esta fyesta kije dar syertos detalyos sovre un lugar ke se izo el simbolo de Yerushalayim.
La pared oksidental (de Yoros/ Lamentos) es el lugar sagrado mas aksesivle en la vida Djudia. Kon 28 filas de pyedras grandes sovre la tyerra (i 17 debasho), la Pared afilu a la vista es fizikamente impresyonante. Su santedad provyene del fakto de ke es el lugar lo mas serka ande se topava el lugar lo mas santo en el Templo: Kadosh Ha Kedoshim.
Kuando el Rey Herod fraguo por primera vez la Pared Oksidental komo parte de una pared de apoyo para el Segundo Templo, esta pared teniya 24 filas de pyedras mas kurtas i detuvo esta altura durante kaji syete siglos. Las otras filas fueron atribuyidas a otros tyempos. El Segundo Templo kayo en el anyo 70 D.K., i despues de sofokar el alevantamyento de Bar Kochba en 135 D.K., los Djudios fueron kompletamente egzilados de Yerushalayim. No se les permityo bivir en Yerushalayim ni azer orasyones en la Pared asta el empesijo del siglo V, kuando Aelia Eudocia, la emperatriza bizantina, les dyo la permisyon.
Bazandomos sovre los dokumentos istorikos, parese ke a los Djudios se les permityo vinir a la Pared de Yoros durante una grande parte de la Edad Media. Malorozamente, despues del vensimyento de los kruzados por Saladin (1187), el ijo de Saladin empeso a fraguar una "maale marokana" para las kazas a sus fideles partizanos. I estos echavan regularmente sus chopes en el espasyo de 13 metros ke aviya kedado entre las kazas i La Pared santa.
En 1517, los turkos otomanos konkistaron Yerushalayim. Basho los Otomanos, se metyeron varias leyes ke permitiyan a los Djudios de ir a la Pared para orasyones, ma en mizmo tyempo fue defendido de azer bruido i meter mezas en el estrecho kamino en frente de La Pared.
Kuando los Britanikos tomaron el kontrol de Yerushalayim de las manos de los Otomanos (1917), los Djudios tuvyeron ke luchar konstantamente por sus derecho de azer orasyones en La Pared. Despues de la gerra de 1948, la Jordania tomo el kontrol de toda la Sivdad Vieja. Aunke en el Akordo de Armistisyo de 1949, estava eskrito ke a los Djudios se les permitiriya el akseso a la Pared, los Jordanianos nunka lo permityeron.
Durante la Gerra de los Sesh Dias de 1967 (el 28 de Iyar), las Fuersas de Defensa de Israel rekuperaron la Sivdad Vieja. Poko despues, derrokaron la “Maale Marokana” i engrandesyeron la plaza en frente de la Pared permityendo el akseso a todos ke keriyan vinir i azer orasyones en este lugar santo.
Antes de eskapar, un detalyo: el termino de “Pared de Yoros” es en realidad un termino moderno ke aparesyo solo a la fin del siglo XIX i empesijo del XX. Puede estar bazado en el antiguo nombre arabo de la Pared, El-Mabka, ke sinyifika “el lugar de yorar”. Tanto El-Mabka komo la Pared de Yoros se refieren a los Djudios ke, a lo largo de la istorya, aviyan vinido a este lugar para yorar por los Templos perdidos. Aktualmente en Ebreo se yama “Kotel Ha Maaravi”, la Pared Oksidental.
