Aviya en un apartamento, famiyas ke moravan ayi desde munchos anyos. Kada famiya siguro teniya dos, tres ijos/ijas. Estas kriyaturas nasyeron, se engrandesyeron, se fueron a las eskolas i se espozaron. Kuando vino la sira de kazar, unos se fueron a otras kazas i otros desidaron de morar kon sus madres o esfuegras.
Un diya, el mansevo del numero 8 se kazo i ampesaron a morar kon sus padres. La novya mansevika era eskapada de lise. Para akel tiempo era bastante enstruida. Era muy ermozika i biva ma teniya un huy negro ke “saviya todo”. Por egzemplo: akel diya era la moda de trikotar bluzas, shales, jaketas de diferentes modeles. No saviya ni tomar los shishes en la mano, demandava a las vizinas. Las vizinas le keriyan ambezar kon grande plazer. Djusto ke ya se ambezo un poko, diziya: Ya se, ya lo saviya. Esto lo aziya i para los gizados. Keriya gizar una koza, demandava por aki por aya, kuando le ayudavan, pishin diziya ya lo se.
A la fin, las vizinas se ampesaron a inyervarsen. I desidaron de azerle un djugo.
El diya sigiente la mansevika merko gayina. Akel tiempo las gayinas viniyan kon todos los organes aryentro. No eran komo agora limpyas i lavadas. Yene, se fue ande una vizina a demandar komo se giza esta gayina. La vizina ke topo okazyon para darle una leson, le disho. Na toma la gayina i metela aryentro la kaldera i un poko de agua i sal, este kadar. Eya pishin: Aaa ya lo se, ya lo se. Se fue a kaza i metyo la gayina tal ke estava a la kaldera i la metyo a kozer.
Vino el marido a kaza. Una golor, una golor terivle en kaza. Le disho a su mujer: Kualo es esta golor dezgrasyada? Esto gizando gayina porke te plaze, demandi a las vizinas i eyas me disheron komo gizarla, le respondyo la mujer. El marido se inyervo muncho i se fue direktamente ande la vizina ke le disho komo gizarla.
La vizina ampeso a kontarle: Mira tienes muncha razon pasha, tu mujer viene a demandarmos un konsejo, djusto ke mozotros le ampesamos a darle la tarifa, mos dize “ya se, ya se” i mos inyervamos. Esta vez kijimos darle una leson i buena. Si ya save todo, deke metyo la gayina kon lo suzyo de aryentro. Para pardonarmos, vos gizi yo una gayina, ke no kedesh sin komer noche de Shabat.
I ansina se enderecho la koza i la manseva mas no se izo de la “muncho savida”.
