El diya de las Madres es un diya al anyo ke mos akodramos de muestras madres i las onoramos o los ijos se akodran de sus madres. A vezes afita ke i los inyetos se akodran de sus nonas o los paryentes empushan los inyetos a ke digan o ke eskrivan un byervo a sus nonas. Despues de este diya todo torna a su lugar. Ay ken da una flor, un regaliko a la madre. Ama en jeneral todo se aregla kon un telefoniko. “Mama, te felisito por tu diya” i esto es todo. Por tanto, la madre aspera kada diya ke la yamen, ke le demanden komo esta, ke seya akodrada por los ijos, por los inyetos, i no solo un diya al anyo.
Todo empeso en la Gresya de la antikuedad. Los gregos i despues los romanos adoraron una diosa ke era konosida komo la “Diosa Madre” tenyendo nombres diferentes komo “Rhea”, “Demeter”, “Sibeles” ke la konosemos basho el nombre de “Kibele”. En Efesos, la diosa de la sivdad era “Artemisa”. Su estatua es konosida komo ke tyene munchos pechos o testikulos, simbolos de alta produktividad, tanbyen se konsiderava komo la “Diosa Madre”. En la mizma sivdad de Efesos, los Kristyanos dyeron el nombre de “Madre de Dyo” “Theotokos” a Miryam ke era la madre de Yeoshua. La selebrasyon se aziya syempre en primavera.
Ansi esta adorasyon de la “Diosa Madre” troko kon el tyempo a selebrar el “Alhad de las Madres” por los primeros Kristyanos. Yene selebrar la Madre un diya de Alhad en la Primavera. En el siglo 16 de M.E (Muestra Era), el Alhad de las Madres troko a ser un diya relijozo para selebrar la “Madre Iglezya”. Un diya de Alhad ke las famiyas ke teniyan servyentes les davan konje para ke se vayan a vijitar sus madres. En el siglo 20, esta tradisyon kaji ke se perdyo asta ke en los Estados Unidos una mujer yamada Anna Jarvis la arebivyo para onorar su madre. Su ambisyon era de asigurar un diya al anyo para ke todos vayan azer onor a sus madres. En el anyo 1914, antes ke empese la primera gerra mondiyal, el Prezidente Amerikano, Wilson firmo la ley dizyendo ke el sigundo Alhad del mez de Mayo va ser el “Diya de la Madre” en toda Amerika. Al empesijo Anna Jarvis fue muy oroza. Ama despues protesto munchisimo a la komersyalizasyon de este diya ke volvyo a ser un diya de merkar i vender regalos por la madre. Entre los regalos, lo mas ke no gustava a Javis eran las kartas preparadas kon refleksyones por la madre sin eskrivir ninguna palavra personal.
Lo ke es enteresante es ke el “Diya de la Madre” se selebra oy, en datas diferentes en los payizes del mundo. En Israel es el 30 de Shevat (este anyo era el 21 de Fevrero). Los payizes Arabos del Medyo Oriyente lo selebran el 21 de Marso en el ekinoks de la Primavera. Espanya i Portugal, el primer Alhad del mez de Mayo. El sigundo Alhad del mez de Mayo es el diya selebrado por la mayoriya de payizes, Polonya el 26 de Mayo, Fransya, el dalkavo Alhad del mez de Mayo, Beljika el 15 de Agosto, Arjantina el treser Alhad del mez de Oktubre, Rusya el dalkavo Alhad del mez de Novembre.
Kol a Kavod a todas las Madres del Mundo. Bendichas son i bendichas ke seyan para syempre .
