Esta semana noche de alhad (dospues de Shabat) estavamos en el Otel CVK Bosphorus ke kreo tyene un roof ande se puede ver la mijor vista d’Estanbol. Empesando del ponte del Bosphorus asta el Palasio de Topkapı, i mizmo las Izlas ke se topan en la mar de Marmara. Una vista maraviyoza.
Noche de Shabat estavamos en la Sinagoga de Ortaköy i teniyamos komo musafires un grupo de Amerikanos enkavesada por la Sinyora Barokas i la famoza kantadera, Sarah Aroeste. Eran un grupo de 13 almas. La mizma noche tuvimos la posibilidad de estar endjuntos kon un grupo de Bulgaros. Entre eyos se topava el prezidente i el Hazan del Kal de Sofia. Reelmente fue una nochada reushida kon el Prezidente Ibrahimzadeh, i el presidente de la Sinagoga de Ortaköy, el Sinyor Elvashvili i el haham, Nafi Haleva kon su famiya i los dos hazanes de la Sinagoga.
Noche de Alhad dospues de la fin de Shabat organizimos una nochada en el CVK Bosphorus. Empesimos kon un kokteil. Es muestra amiga Edna Sarfati ke reelmente mos ayudo para realizar esta nochada, topandomos syertos sponsores. Estavamos mas de syen personas kon los chilkos de las “Estreyikas d’Estanbol”. Dospues de un pranso bastante riko, topimos en la shena a Sarah Aroeste, i dospues a İzzet Bana. Verso la fin las “Estreyikas d’Estanbol” tomaron lugar en la shena. Devemos de rengrasyar a İzzet Bana por sus esforsos. Reelmente lavoro muncho kon su mueva ekipa.
Diya de Alhad en muestro payis uvo las eleksyones para eskojer el Prezidente de la Republika i los parlamentarios del parlamento. Los miembros del parlamento fueron elijidos, i la mayoriya fueron elijidos del partido ke esta oy en el poder. Ma no reushimos a elijir el Prezidente de la Republika. Deviya de resivir mas de 50% de votos. Ma dingun kandidato reusho a tener mas de 50% de los votos. 2 semanas dospues mos vamos a ir una otra vez para elijir el Prezidente de la Republika. Oy en todos los kanales de television tenemos diskusiones sovre los rezultados.
Ay mas de 20 anyos ke muestro payis es dirijido por el mizmo primer ministro ke dospues se izo prezidente de la Republika. I una parte importante del puevlo keren un trokamyento. No se si se va pueder realizar. Ma esto ogurando una epoka de repozo para muestro payiz. Es la koza la mas emportante. El segundo punto es los problemes ekonomikos ke esta bivyendo muestro payiz. I tenemos la esperansa ke estos problemes van a ser rezolvados durante esta epoka.
