Dos pishkados ke no me puedo olvidar la savor.
No es ke no ay agora, ma me parese ke la savor de los kalkanes i de los sifyos de mi chikes era mas mijor.
En la kaza de mis padres kaje kada diya se komiya pishkado. Si no era pishkado gizado era pishkado salado. Vos dizere ke yo no so muy amatora de pishkado. Prefero la karne. Ma mi papa i mi mama se namoravan de pishkados. Por esto no puedo dizir: “pishkado ke seya, el djiz no me emporta”.
Agora o en el tiempo de Pesah es la sezon del pishkado kalkan. No se si es pishkado kasher o no. Ken dize si, ken dize no. Vos kontare los alhades de mi chikes.
Teniyamos el balukchi de muestra famiya ke era Avram Monguldar. Aki lo kero nombrar, ke su alma repoze en Gan Eden. Teniyamos muncha konfiyensa en los pishkados ke mos dava. Koza negra no vendiya. Mi padre kada alhad se iva a su botika a merkar pishkados. Ligado de pishkado, govada de pishkado ke son sus guevos. Al lado aviya uno ke vendiya salatas, ravanikos kolorados, sevoyikas freskas i ajikos freskos. El vendedor tomava su fierro largo ke teniya en la punta un burakito. Pasava este fierro a las salatas, los ravanikos i las sevoyas, despues enfilava unos ilos de paja i aziya un buketo i los vendiya. Agora meten esto todo en poshetes de plastik.
Despues se iva ande Lobueno el shekerdji, el padre de Albert Bardavit. Merkava baklava i mas no me akodro de las kozas buenas ke aziya. I viniya a kaza kon las manos yenas.
Mi mama lo aresiviya, le tomava el empleyo i entrava a la kuzina para aparejar.
Esto era el ritual de kada alhad.
Vineremos al kalkan. Desparte ke se se friyiya el kalkan, se friyiya tanbien i los ligados. Mos tresaliyamos de esto. Aparte de el ligado del kalkan, merkavamos tanbien ligado de sifyo. I akeyo se friyiya. Ke savor, ke savor! Agora no estamos topando ligados ni de kalkan ni de sifyo.
La govada teniya otra prosedura. Mi mama metiya la govada en un resipiyente, metiya sevoyika freska, dereot, guevos, sal, pimyenta i un poko de arina. Esto se aziya komo una fatara i se friyiya komo bimuelos. I esto teniya una savor de ennamorar.
Estash viendo tanta fritura? Akel tiempo no aviya ni kolesterol ni tansyon? Ken save. Por siguro ke deviya de aver i una kupika de raki al lado.
El sifyo no era komida de alhad, era komida de noche de Shabat. Mi mama lo gizava kon avramila. Es puedeser un pishkado seko, ma al menos no teniya espinas. Por esto me plaziya muncho.
En eskriviendo ya me kayeron las bavas. Por esto va eskapar mi eskrita i vamos a ir a komer pishkado al Bosfor. I una kupika de raki al lado.
Sifyo
