Anna Eskenazi
Un ofisyo kaji ke no se konose mas en muestros diyas es El Halladj. El Halladj era el maestro ke se okupava de ablandar el algodón o la lana bruta para ser empleyada en las almadas, kamas i kolchones.
La palavra Halladj es de raiz árabe. Halch en árabe kere dizir ablandar. El Hallach era el maestro ke tenia un instrumento en forma de arko para travar la filecha. El algodón después de un lavoro largo, metikulozo i muy kanseriozo tomava un briyo komo una seda muy fina. Este algodón se echava a un telar kaji kon un ritmo orkestral komo si fueran pasos de una armada formada de miles de soldados. Chat chat boom, chat chat boom, bum bum, chat chat… El ritmo perpetual del lavoro minusyozo i sus maestros seryozos davan una sensibilidad de orasyon sagrada. Eran los maestros de la perfeksyon absoluta.
El algodón abashava avagar avagar sintiendose komo si fuera el rey de las almadas i kamas ke ivan a yenarsen kon su propriedad en unos pokos segundos. Todo ya estava pronto i preparado en el kortijo para ser empleado mas después kon alegria. El hallach djugava un gran rolo en el ashuar de la novya. Las kolchas i los kolchones puediyan ser de seda pura lavradas de dizenyos elegantes. Las almadas también tenían inisyales de la novya.
Moyete es el agodon, riente es el Hallach i kontente seran los ke los van a estrenar. Esuenyos dulses i repozo bueno kon sanedad.
