El mez de Mayo es el mez kuando se arebive la natura, se envedresen los arvoles, las triandafilas blankas, koloradas i roz i las tulipes de kolores a kolores. Sovre todo esta sezon, el bosfor es fantastiko, si te asentas en un bodre de mar, solo mirar enfrente vale un milyon. (al tyempo diziyan ansi) Yo oy en diya va dizir ke vale un milyon de dolares.
En el mez de Mayo no se arebive solo la natura, se arebive i el arte. Las ekspozisyones, los konsertos, los festivales.
El 15 marso, tuve el onor de asistir a un program muy enteresante i primera vez en Turkiya. El program se realizo en el sentro kultural AKBANK.
El tema del program era “diskorsos de istorya en nuestro teatro, “Turkish Theatre Foundation”.
Entre 8 diskorsos, el sigundo diskorso fue ela piesa, “KULA 930”. La memorya ke se desaparese de las memoryas de sinko siglos, de la komunidad djudiya kontado muy byen por la Dra. RİVKA BİHAR WALDMAN.
Rivka eskojo un teatro ke se djugo mas syen vezes, kon kaji 100 djugadores diferentes en 40 anyos. “Kula 930” es un klasiko, entre todos los teatros ke se djugaron en Turkiya: Estanbol i İzmir i mezmo en Israel.
Yo tuve la shans de entrar a este djugo en la tresera versyon, en el anyo 2000.
Atras 20 anyos una demanyana tomi un telefon de muestro kerido amigo, en ganeden ke este, Selim Hubeş, dizyendo ke la piesa, “Kula 930” se va meter en shena por la tresera vez. En primero se djugo en el anyo 1977 i repetado en el 1987.
“Forti mozos los djugadores vyejos del Dostluk Yurdu Derneği desidimos de djugar de muevo “Kula 930” i te eskrivi un rolo para ti. Ke dizes?”
Yo ke lo tengo visto puedeser mas de10 vezes komo spektadora en el lokal del Dostluk, Osmanbey, agora va ser djugadera en este djugo? De vista le dishe: “Si, deke no?” sin demandarle kualo va ser mi rolo. En verdad me dyo un karakter muy ermozo, ke me plazyo muncho i ke plazyo a todos. En el anyo 2000, tuve el onor de partisipar a este grupo volontaryo, kerensyozo i de muncho sakrifisyo.
Rengrasyo a Rivka Bihar ke dospues de tantos anyos, en este lokal seryozo, kon un salon yeno de djente, (turkos, gregos, ermenis) oyir la estorya de “LA KULA” kon fotografiyas i videos, veramente me emosyono muncho. Solo lo ke me izo muncha pena fue, ke de kaji sesenta djugadores mas de mi no aviya dingunos!
